Toshkent shahar Yunusobod tumanidagi do‘konda savdo qiluvchi fuqaro va uning turmush o‘rtog‘ida 1-iyun kuni koronavirus tasdiqlangani haqida xabar berilgan edi.
Sanitariya-epidemiologiya nazorati davlat inspeksiyasi bosh inspektori Nurmat Otabekov 3-iyun kuni bo‘lib o‘tgan brifingda mazkur do‘konning aynan qayerda joylashganiga aniqlik kiritmadi.
Nurmat Otabekovga “Men Yunusobod tumanida yashayman. Shu tumanda do‘kon egasida koronavirus aniqlanganini eshitdim. Aynan qaysi daha va qaysi do‘konda aniqlangani to‘g‘risida batafsil ma’lumot bera olasizmi?” degan savol berildi.
Bosh sanitariya inspektori esa “Yunusobod tumanidagi do‘konda virus aniqlanganligi uydan chiqishda ehtiyot choralarini ko‘rish uchun yetarli, deb o‘ylaymiz”, deya savolga javob qaytardi.
Eslatib o‘tamiz, Yunusoboddagi mazkur do‘kon sotuvchisining kasalligi 1-iyunda tasdiqlangan “O‘rikzor” bozoridagi sotuvchi bilan muloqotda bo‘lgan va undan mahsulotlar sotib olgan. Shuningdek, “O‘rikzor”dagi mazkur sotuvchining qizida ham koronavirus aniqlangan.
Sog‘liqni saqlash vazirligi 23-may kuni bozorlar xodimlarini ommaviy testdan o‘tkazish jarayonida Toshkentdagi “O‘rikzor” bozoridagi sotuvchilarning birida koronavirus aniqlanganini ma’lum qilgan edi. Shundan so‘ng, bozor vaqtinchalik yopilgandi. Keyinroq mazkur sotuvchining farzandlarida ham koronavirus aniqlandi.
Izoh (0)