Апрель ойида Россиянинг кўплаб авиакомпаниялари ўз рейсларини тўлиқ ёки қисман бекор қилди. Июндан бошлаб ички авиақатновларнинг айримлари яна амалга оширила бошлайди. Бироқ авиапарвозлар аввалгидек бўлмайди, деб ёзмоқда Recodе’га асосланиб Meduza. Самолётларда йўловчилар учун янги қоидалар ишлаб чиқилади, ҳаво лайнерлари салонида жиддий ўзгаришлар бўлади, шунингдек, саёҳатчилар аэропортларда вақтини аввалгидек чоғ ўтказа олмаслиги мумкин.
Одамлар самолётда нисбатан камроқ парвоз қилади. Бунга авиапарвозларнинг аввалгига нисбатан қимматлашиши сабаб бўлади. Dollar Flight Club арзон чипталар сервиси 2021 йилда битта авиачиптанинг нархи 35 фоизга тушиб кетиши, бироқ 2025 йилга бориб билет икки баравар қимматлашиши мумкинлигини тахмин қилмоқда.
Самолётдаги буюмлар, ташқи жисмлар билан контактга киришиш камаяди. АҚШдаги тўртта аэропорт юкларни ўзаро мулоқотсиз топширишни синовдан ўтказмоқда: бунинг учун юкларни аввалдан рўйхатдан ўтказиш лозим, пассажир багажни олиш учун келганда жараённи QR-код билан тасдиқлайди. Аэропортларда алмисоқдан қолган рўйхатга олиш терминаллари ўрнида сенсор экранга бармоқ босиш талаб қилинадиган, одам юзини сканерлаб ёки овоз орқали унинг шахсини аниқлаш технологияларидан фойдаланиш бошланиши мумкин. NES корпорациясининг маълум қилишича, инсон юзини сканерлаш орқали унинг шахсини аниқлаш технологияси одамлар тиббий ниқоб таққан ҳолатида ҳам ишлайди. Янги технология турнақатор навбатларни камайтиради ва йўловчиларнинг аэропортда бўлиш вақтини ҳам қисқартиради.
Йўловчиларнинг саломатлиги назоратга олинади. Текшириш ҳудудида катта эҳтимол билан фақат иситма ўлчаб турилади (бу ҳозир ҳам бажарилмоқда). Лекин энди фақат ушбу иш билан чекланиб қолмасдан қон босими ва юрак пулси ҳам текширилиши мумкин. Бунда йўловчиларнинг ўзи навбатда турмасдан мустақил равишда соғлиғи ҳақида хабар қилиши кўзда тутилган. Масалан, Clear компанияси Health Pass (саломатлик паспорти) тизимини ишлаб чиқди, бунда саёҳатчилар ўз соғлиғи ҳақидаги маълумотларни, жумладан, охирги марта топширган таҳлиллар натижасини тақдим қилиб маълумотни тасдиқлайди. Ғояга кўра одамлар ушбу хизматдан фойдаланиб, QR-кодни махсус киоскда сканердан ўтказиб навбатда турмай иш битира олиши таъминланади.
Самолётлар ҳам ўзгаради. Ўртадаги ўриндиқ блокланади, тиббий ниқоб тақиш мажбурий бўлади, эконом классда учганлар навбатларнинг олдини олиш учун бизнес классдан аввал самолётдан туширилади — бу ҳам реалликка айланиши мумкин. Энг қизиқ томони бу — янги турдаги самолёт салонига киритилаётган дизайнерлик ўзгаришлари бўлиши кутилмоқда. Масалан, ўриндиқлар ораси ва салондаги қаторларга пластмассадан қилинган шаффоф қалқонлар қўйилиши. Айрим авиакомпаниялар самолёт ичидаги материалларни ўзгартирмоқчи. Бу ҳақда Collins Aerospace Interiors’нинг маҳсулотлар ва савдодан кейинги хизмат кўрсатиш масалалари бўйича вице-президенти Грант Вест маълум қилган. Ҳозир унинг жамоаси патоген микроорганизмларни сиқиб қўя оладиган материаллар, жумладан, бир марталик фойдаланишга мўлжалланган буюмлар устида бош қотирмоқда.
Пандемия даврида авиалиниялар чеклаб қўйилди ёки парвозларнинг айримларида бортда озиқ-овқат ва ичимликлар истеъмол қилишга чекловлар қўйилди. Масалан, Аmerican Airlines эконом классда алкогол маҳсулотлари сотувини тўхтатди (тақиқ биринчи классга тааллуқли эмас). АҚШнинг Delta авиакомпанияси эса йўловчиларга ичимликлар орасидан фақат шиша идишдаги сувни таклиф этмоқда.
Аэропортлар энди кўнгилочар марказдек фаолият олиб бормайди. Сўнгги йилларда аэропортларга миллиардлаб долларлар сарфланар — дўконлар, ресторанлар ва бошқа кўнгилочар жойлар барпо қилинарди. Умуман олганда, йўловчиларнинг авиапарвозлар бўйича хизматлардан кўпроқ фойдаланиши ва кўпроқ маблағ сарфлаши учун шароитлар яратиларди. Пандемия сабаб аэропортлар ҳудудидаги савдо майдончалари аста-секин йўқола бошлайди.
Изоҳ (0)