Тожикистон соғлиқни сақлаш вазири Жалолиддин Абдуллозода «СССР» газетасига берган интервьюсида мамлакатда коронавирус касаллигининг энг юқори чўққиси ортда қолганини маълум қилди.

«Энг юқори чўққи 15 майда, бир кунда 211 кишида коронавирус аниқланганидан сўнг ортда қолди. 15 майдан кейин кундан кунга янги касаллар сони камайиб, соғаяётганлар ортмоқда. Кўриб турганингиздек, сўнгги кунларда вирус оқибатида ҳеч ким вафот этмади», — дейди вазир.

Абдуллозоданинг сўзларига кўра, улар COVID-19 билан боғлиқ айрим ўлим ҳолатларини текшириб кўрган, бироқ аслида марҳумларнинг ўлимига бошқа нарса сабаб бўлгани аниқланган.

«Бу одамлар, масалан, операциядан чиққан ёки шунт ўрнатган, ё бўлмасам қандли диабети борлар. Бу каби вазиятда озгина стресс ҳам аҳволнинг ёмонлашишига салбий таъсир кўрсатиши мумкин. Айнан қўрқув кўпчиликни касалхонага олиб келган…», — дейди соғлиқни сақлаш вазири.

Унинг таъкидлашича, касаллар сонининг камайганини мобил шифохоналарнинг бўшаб қолганидан билиш мумкин.

«Касалларни қабул қилиш учун захира сифатида тайёрлаб қўйилган мобил госпиталлар ҳамон бўш ётибди. Ҳалигача уларнинг бизга кераги бўлмади. Шифохоналаримиз бўшаяпти, касаллар сони камаймоқда», — дейди у. Абдуллозоданинг қайд этишича, кейинги ҳафтадан COVID-19 билан касалланганларни фақат 2 та касалхона қабул қилади — қисман «Шифобахш» ва «Истиқлол» клиникасининг иккита корпусида. Қолган шифохоналар бўшатилади.

Шу билан бирга, соғлиқни сақлаш вазири мамлакатда коронавирусни даволаш учун барча зарурий дори воситалари мавжудлигини маълум қилган.

«Вазирлик омборларида барча керакли дори ва тиббиёт воситалари етарли даражада сақланмоқда. Ҳар куни шаҳар ва туман бош шифокорларига зарурий дори воситаларини захирага олиб кетишини ва шифохоналардаги ҳамда уйда даволанаётган беморлага бепул тарқатиши бўйича вазифа қўяман. Соғлиқни сақлаш вазирлиги ва тиббиёт муассасаларининг омборларида ҳозирда ‘Арбидол’, ‘Эргоферон’, ‘Иммунал’, ‘Левофлакцин’, ‘Амиксин’, ‘Азитромицин’, ‘Гидроксихлорохин’, ‘Делагил’, витаминлар ва бошқа дори воситалари етарли даражада. Бундан ташқари, 2-3 миллион ниқоб ҳам бор… Қўрқманг, ваҳимага берилманг, доирларни сотиб олманг, чунки коронавирусга чалинганлар учун дори воситалари, жой, хизмат кўрсатиш ва овқатлар 100 фоиз бепул», — дейди вазир.

Эслатиб ўтамиз, Тожикистонда коронавирус дастлаб 30 апрель куни аниқланганди. Бир ой ичида мазкур мамлакатда коронавирусга чалинганлар сони 3807 кишига етди.