Бразилияда ўтган бир сутка ичида яна 33 274 кишида коронавирус аниқланди. Бу ҳақда мамлакат Соғлиқни сақлаш вазирлиги расмий статистика маълумотларига таяниб, «ТАСС» хабар берди.
Ушбу кўрсаткич кетма-кет учинчи кун рекорд натижаларни қайд этмоқда (28 май куни — 26 417 киши, 29 май куни — 26 928 киши). Бутун мамлакат бўйлаб COVID-19 коронавирус инфекцияси аниқланган беморлар сони 498 440 кишига етди. Ўтган бир сутка давомида 956 киши вирус оқибатида вафот этган бўлиб, жами қурбонлар сони 28 834 кишига етган.
Маълумотларга кўра, мамлакатда коронавирусга чалинган беморларнинг 200 мингдан ортиғи соғайишга муваффақ бўлган. Идоранинг статистикасида келтирилишича, мамлакат аҳолисининг ҳар 100 минг нафарига 237,2 бемор ва 13,7 қурбон тўғри келмоқда. Касаллик оқибатида юзага келаётган ўлим улуши 5,8 фоизни ташкил этмоқда.
21 миллиондан ортиқ одам истиқомат қиладиган мамлакат жануби-шарқидаги Сан-Паулу штати Бразилияда инфекция ўчоғига айланган. Минтақада 107 мингдан ортиқ одамда коронавирус аниқланган, 7,5 минг кишидан ортиқ бемор вафот этган. Иккинчи ўринда 52,5 минг касал билан Рио-де-Жанейро кетмоқда. Мазкур ҳудудда коронавирус қурбонлари сони (5277 киши) Хитой ва Ҳиндистондаги қурбонлар сонидан ошиб кетди.
Мавзуга доир: Кейинги пандемиянинг эҳтимолий сабаби Амазониядаги вирус бўлиши мумкинлиги маълум қилинди
Изоҳ (0)