Ўзбекистонда пенсияларнинг қайтадан нақд пулда тўланиши учун пенсионерлардан ариза талаб этилмайди

Президент Шавкат Мирзиёев раҳбарлигида 2020 йил 13 май куни ўтказилган видеоселектор йиғилишида аҳоли ва кекса ёшдаги фуқаролардан келиб тушаётган кўплаб мурожаатларни инобатга олиб, пенсиялар нақд шаклда тўланиши белгиланганди. Молия вазирлиги ҳузуридаги Пенсия жамғармаси тўловлар қандай тартибда амалга оширилиши ҳақида «Дарё»га маълумот берди.

Президент томонидан берилган топшириққа мувофиқ, 2020 йил июнь ойида пенсия ва нафақалар фуқароларга аввалгидек нақд пул шаклида амалга оширилади. Бунда пенсияларини нақд пулга қайтарилиши бўйича фуқаролардан «Халқ банки» ёки Пенсия жамғармасига ариза бериш талаб этилмайди.

Маълум қилинишича, нақд пулда пенсия тўловлари «Халқ банки»нинг сайёр кассалари томонидан карантин қоидаларига риоя қилинган ҳолда пенсионерларнинг яшаш манзилларига одатий графикка мувофиқ ҳар ойнинг 27-санасига қадар етказилади.

Банк пластик картаси орқали олишни давом эттириш мумкинми?

Пенсияларини банк пластик карталари орқали олиш истагини билдирган (ариза берган) ҳамда май ойидан аввал банк картаси орқали пенсия олиб келган фуқароларга тўловларни июнь ойида ҳам банк пластик карталари орқали тўлаб бериш давом эттирилади.

Аввалги аризаларига мувофиқ пенсияларини қисман нақд ва банк карталари орқали олиб келган фуқароларга июнь ойидан пенсиялар уларнинг аризаларида белгиланган нисбатларда амалга оширилади. Банк пластик карталари орқали пенсия ва нафақа олувчиларга маблағлар 3—8 июнь санасида тўлиқ молиялаштириб берилиши режалаштирилган.

Пенсияларни банк пластик картасига ўтказиш учун нима қилиш лозим?

Фуқароларнинг оворагарчиликлари олдини олиш мақсадида Пенсия жамғармаси ва «Халқ банки» томонидан ҳамкорликда қўшма келишув имзоланган.

Бунда ўз пенсияларини банк пластик карталарига ўтказиш истагини билдирган фуқароларнинг кўчага чиқиши талаб этилмайди. Яъни фуқаролар «Халқ банки»нинг 1106 ёки Пенсия жамғармасининг 1140 ишонч телефонига мурожаат қилиши кифоя. Ушбу мурожаатга кўра, «Халқ банки» сайёр кассаси томонидан пенсионернинг яшаш манзилига борилган ҳолда ариза ва шартнома расмийлаштирилади.

Пенсионерлар уйдан чиқмаган ҳолда пенсия тўловини бошқаради.

Бугунги кунда Пенсия жамғармаси томонидан Марказий банк ва тижорат банклари билан ҳамкорликда пенсионерлар томонидан пенсия пулларини бошқариш имконини берувчи мобил илова ишлаб чиқилмоқда.

Ушбу мобил илова ёрдамида пенсионерлар уяли телефонлари орқали банк ёки Пенсия жамғармасига бормаган ҳолда банк пластик картасини очиш ҳамда пенсияларини ушбу банк картасига ўтказиш учун масофадан туриб ариза бериш имкониятига эга бўлади.

Эслатиб ўтамиз, май ойидан бошлаб пенсия, нафақа ва иш ҳақларини тўлиқ банк пластик карталари орқали тўлаш бошланган эди. Шундан кейин ижтимоий тармоқлар фойдаланувчилари карталарни етказиб бериш билан боғлиқ муаммолар, карталарни олиш учун «Халқ банки» филиалларида юзага келган узоқ навбатлар ва пенсия тўловларидаги кечикишлар, шунингдек, Humo карталари ёрдамида тўловларни амалга оширишдаги мураккабликлар ҳақида маълум қилган.

Марказий банк пенсияларни банк карталари орқали етказиб бериш бўйича ишлар керакли даражада йўлга қўйилмаганини, бу эса аҳоли учун қатор ноқулайликларни юзага келтиргани ва асосли эътирозларга сабаб бўлганини тан олганди.