Ўзбекистонда санъаткорларнинг касб байрами нишонланиши белгиланди. Бу ҳақда Ўзбекистон Президентининг «Маданият ва санъат соҳасининг жамият ҳаётидаги ўрни ва таъсирини янада ошириш чора-тадбирлари тўғрисида»ги фармонида айтилади.
«Ўзбекистон Республикаси Олий Мажлиси палаталари, Маданият вазирлиги, ‘Ўзбеккино’ миллий агентлиги, Ўзбекистон Бадиий академияси, Ўзбекистон Ёзувчилар уюшмаси, Ўзбекистон композиторлари ва бастакорлари уюшмаси, Ўзбекистон театр арбоблари уюшмаси, Республика Маънавият ва маърифат маркази ҳамда кенг жамоатчиликнинг маданият ва санъатнинг жамиятимиз ижтимоий-маънавий ҳаётида тутган ўрнини ҳисобга олиб, соҳа ходимларини қўллаб-қувватлаш мақсадида 15 апрель санасини ‘Ўзбекистон Республикаси маданият ва санъат ходимлари куни’ деб эълон қилиш тўғрисидаги таклифи маъқуллансин», — дейилади ҳужжатда.
Белгиланишича, маданият вазирлиги ўн кун муддатда «Ўзбекистон Республикаси маданият ва санъат ходимлари куни»ни белгилаш бўйича қонун лойиҳасини белгиланган тартибда Вазирлар Маҳкамасига киритади.
Шунингдек, ҳужжатда маданият ва санъат соҳаси вакилларининг Санъаткор, ижодкор ва ижрочиларнинг муаллифлик ҳуқуқларини ҳимоя қилиш палатасини ташкил этиш ҳақида ҳам сўз боради.
Қайд этилишича, палата мулкий ҳуқуқларни жамоавий асосда бошқарадиган ташкилот ҳисобланади.
Палата фаолиятининг дастлабки босқичларида уни қўллаб-қувватлаш учун Маданият вазирлиги ҳузуридаги Маданият ва санъатни ривожлантириш жамғармаси маблағлари ҳисобидан 1 миллиард сўм ажратилади.
Изоҳ (0)