Ўзбекистон Президентининг 2020 йил 26 майдаги «Маданият ва санъат соҳасининг жамият ҳаётидаги ўрни ва таъсирини янада ошириш чора-тадбирлари тўғрисида»ги фармонига мувофиқ, Ўзбекистонда ҳар ойнинг биринчи якшанбасида давлат музейларига кириш бепул бўлади. Бу ҳақда Адлия вазирлиги хабар берди.
Фармонга мувофиқ, 2020 йил сентябрь ойидан бошлаб давлат музейларида ҳар ойнинг биринчи якшанбаси «очиқ эшиклар куни» деб эълон қилинди. «Очиқ эшиклар куни»да фуқаролар давлат музейларига бепул киритилади.
Ҳужжатга кўра, 2020—2025 йиллар давомида босқичма-босқич ҳар бир туман ва шаҳарда тарих ва маданият давлат музейларининг филиаллари шаклидаги ўлкашунослик музейлари ташкил этилади.
Фармон билан 15 апрель «Ўзбекистон Республикаси маданият ва санъат ходимлари куни» деб эълон қилинди.
Эслатиб ўтамиз, аввалроқ Тошкент шаҳридаги Адиблар хиёбонида Тошкент шаҳри музейи, «Ғалаба боғи»да эса «Шон-шараф» музейи очилганди. Шунингдек, Ўзбекистонда 22 майдан «сариқ» ва «яшил» ҳудудларда карантин сабабли ёпилган музей ва санъат галереялари фаолиятига рухсат берилди.
Изоҳ (0)