O‘zbekistonda san’atkorlarning kasb bayrami nishonlanishi belgilandi. Bu haqda O‘zbekiston Prezidentining “Madaniyat va san’at sohasining jamiyat hayotidagi o‘rni va ta’sirini yanada oshirish chora-tadbirlari to‘g‘risida”gi farmonida aytiladi.
“O‘zbekiston Respublikasi Oliy Majlisi palatalari, Madaniyat vazirligi, “O‘zbekkino” milliy agentligi, O‘zbekiston Badiiy akademiyasi, O‘zbekiston Yozuvchilar uyushmasi, O‘zbekiston kompozitorlari va bastakorlari uyushmasi, O‘zbekiston teatr arboblari uyushmasi, Respublika Ma’naviyat va ma’rifat markazi hamda keng jamoatchilikning madaniyat va san’atning jamiyatimiz ijtimoiy-ma’naviy hayotida tutgan o‘rnini hisobga olib, soha xodimlarini qo‘llab-quvvatlash maqsadida 15-aprel sanasini ‘O‘zbekiston Respublikasi madaniyat va san’at xodimlari kuni’ deb e’lon qilish to‘g‘risidagi taklifi ma’qullansin”, — deyiladi hujjatda.
Belgilanishicha, madaniyat vazirligi o‘n kun muddatda “O‘zbekiston Respublikasi madaniyat va san’at xodimlari kuni”ni belgilash bo‘yicha qonun loyihasini belgilangan tartibda Vazirlar Mahkamasiga kiritadi.
Shuningdek, hujjatda madaniyat va san’at sohasi vakillarining San’atkor, ijodkor va ijrochilarning mualliflik huquqlarini himoya qilish palatasini tashkil etish haqida ham so‘z boradi.
Qayd etilishicha, palata mulkiy huquqlarni jamoaviy asosda boshqaradigan tashkilot hisoblanadi.
Palata faoliyatining dastlabki bosqichlarida uni qo‘llab-quvvatlash uchun Madaniyat vazirligi huzuridagi Madaniyat va san’atni rivojlantirish jamg‘armasi mablag‘lari hisobidan 1 milliard so‘m ajratiladi.
Izoh (0)