Қашқадарё вилоятининг Шаҳрисабз шаҳрида Амир Темур шарафига бунёд этилган Кўк гумбаз масжиди девори ўпирилиб тушгани ва бунга масъуллар эътибор бермаётгани ҳақида хабар берилганди. Шаҳрисабз шаҳар ҳокимлиги ахборот хизматининг ёзишича, мазкур ҳолат масъуллар назоратига олинган.
«Шаҳар ҳокимлиги ахборот хизмати ҳолатни ўрганиш мақсадида мутасадди ташкилот масъуллари билан мулоқот ўтказди, — дейди ҳокимлик ахборот хизмати раҳбари Гулнора Узоқова. — Маданият вазирлигининг маданий мерос департаменти масъули К.Ақилова топшириғига асосан тузилган ишчи гуруҳ аъзолари Кўк гумбаз мажмуасида ўрганиш ишларини олиб боришмоқда. Гуруҳ аъзолари сафида маданий мерос департаменти бош архитектори Б.Матжонов, вилоят маданий мерос бошқармаси бошлиғи Ж.Ҳалилов, «Мерос Чашмаси» ДУК директори Ф.Ўткиров, илмий эксперт кенгаши аъзози А.Турдиев, ТАҚИ катта ўқитувчиси Б.Раҳмонов ва ўндан ортиқ мутахассислар бор».Гулнора Узоқованинг маълумот беришича, мутахассислар томонидан ушбу иншоот ўрганиб бўлингач, якуний хулоса илмий кенгашда кўриб чиқилади. Шундан сўнг мажмуада реконструкция ишларини олиб боришга рухсат этилади.
Шаҳар ҳокимлиги ахборот хизмати Кўк гумбаз мажмуаси билан боғлиқ илмий хулоса натижаси ҳамда таъмирлаш ишларининг бориши ва ўзгаришлар ҳақида жамоатчиликни хабардор қилишини қўшимча қилган.
Изоҳ (0)