Президент Шавкат Мирзиёев раислигида 26 май куни инвестиция масалалари муҳокамасига бағишланган видеоселектор йиғилиши бўлиб ўтди. Йиғилиш аввалида Ўзбекистонда коронавирус пандемиясига қарши кураш борасида амалга оширилаётган ишлар ҳақида алоҳида тўхталиб ўтилди.
Бугунгача чет элдан олиб келинган Ўзбекистон фуқаролари сони 47 минг нафарни ташкил этаётгани маълум қилинди. Кейинги 10 кунда эса 3,5 минг одам ҳаво йўллари, 7 мингга яқин ватандош эса чегара постлари орқали Ўзбекистонга келиши кутиляпти.
Айни вақтда, давлат раҳбарининг таъкидлашича, «уларнинг, айниқса кейинги икки ҳафта давомида кириб келганларнинг аксариятида коронавирус аниқланган» (умуман, сўнгги кунларда Ўзбекистонда аниқланган касалланиш ҳолатларининг қарийб 50 фоизини хориждан келган фуқаролар ташкил этади).
«Фуқароларимиз қайтиб келаётган давлатлар ҳамда қўшни мамлакатлардаги вазиятнинг оғирлигини ҳисобга олиб, хотиржамликка берилиш мумкин эмас», — деди Президент. Шавкат Мирзиёевнинг қайд этишича, яна 100 минг нафардан ортиқ ватандош Ўзбекистонга қайтиш истагини билдириб, навбат кутмоқда.
Мавзуга доир:
Шунингдек, Россия—Қозоғистон чегарасида тўпланган 1100 нафар ватандош Президент топшириғига асосан 18—19 май кунлари автобусларда Ўзбекистонга олиб кетилди. Кейинчалик худди шу чегара зонасида яна юзлаб ўзбекистонликлар тўплангани маълум бўлди. ТИВ улардан вақтинчалик яшаш жойларига қайтишни сўради.
Бундан аввал Ўзбекистон Ташқи ишлар вазирлиги Россияда карантин чекловлари шароитида бўлиб турган 65 мингга яқин фуқаро ватанга қайтиш бўйича онлайн ариза топширганини маълум қилган эди. Россияда оғир аҳволда қолган ватандошларга моддий ёрдам кўрсатиш чоралари ҳам кўрилмоқда.
22 май куни Бошқирдистонда 53 нафар ўзбекистонлик меҳнат муҳожирида коронавирус инфецкияси аниқлангани ҳақида хабарлар тарқалган эди. Ўзбекистон Ташқи ишлар вазирлиги томонидан 18 апрелда берилган ахборотга кўра, Австрия, Арманистон, АҚШ, БАА, Греция, Исроил, Корея, Покистон, Россия, Таиланд, Туркия, Япония ва Қозоғистонда бўлиб турган 73 нафар Ўзбекистон фуқаросида коронавирус инфекцияси аниқланган, уларнинг камида тўрт нафари вафот этган эди.
Маълумот учун, 26 май соат 17:00 ҳолатига кўра Ўзбекистонда 3281 та ҳолатда коронавирус инфекцияси билан касалланиш ҳолати аниқланган, беморларнинг 2627 нафари соғайган, 13 нафар бемор эса касаллик асоратлари оқибатида вафот этган.
Изоҳ (0)