Жиззах вилояти Пахтакор туманида фуқаронинг номига имтиёзли кредит ажратиб, пулларни ўз эҳтиёжлари учун сарфлаб юборган банкнинг собиқ ходимларига нисбатан жиноят иши қўзгатилди. Бу ҳақда Бош прокуратура «Дарё»га маълум қилди.
Бош прокуратура ҳузуридаги департаментнинг Пахтакор туман бўлими томонидан ўтказилган терговга қадар текширувда, АТБ «Агробанк» Пахтакор филиали собиқ мансабдор шахслари ва бошқалар расмий ҳужжатларга сохта маълумотлар киритгани аниқланди.
Улар 2018 йилнинг июнь—декабрь ойларида фуқаро А.Х. номига паррандачилик фаолиятини ташкил этиш ва миллий ширинликлар ускунаси сотиб олиш учун жами 197 миллион сўм имтиёзли кредит ажратишга эришган. Бироқ банк ходимлари ушбу кредит маблағларини унга бермасдан, ўзлаштириш йўли билан талон-торож қилган.
Мазкур ҳолат юзасидан АТБ «Агробанк» Пахтакор филиали собиқ мансабдор шахслари ва бошқаларга нисбатан Жиноят кодексининг тегишли моддалари билан жиноят иши қўзғатилиб, тергов ҳаракатлари ўтказилмоқда.
Изоҳ (0)