1999 йилнинг 26 май куни «Камп Ноу» стадионида Европа Чемпионлар Лигаси тарихидаги афсонавий финал учрашуви бўлиб ўтганди. Ҳал қилувчи баҳс «Манчестер Юнайтед» ва «Бавария» жамоалари ўртасида кечган.
Мюнхенликлар учрашув аввалида ҳисобни очади. Марио Баслер жарима зарбасини қойилмақом ижро этган ҳолда Петер Шмейхелни доғда қолдиради. «Бавария» минимал ҳисобдаги устунликни деярли ўйин якунига қадар ушлаб туради.
Иккинчи бўлимга қўшиб берилган вақтнинг биринчи дақиқасида «Манчестер Юнайтед» футболчилари бурчак зарбасига эга бўлади. Алекс Фергюсон таваккалга қўл уради: жарима майдонига ҳатто Шмейхель ҳам етиб боради. Дэвид Бекҳэм тўпни ўйинга киритади, ҳаводаги тўпга Шмейхель бироз йўналиш беради, Дуайт Йорк эса уни футболчилар томон узатади. Торстен Финк тўпни жарима майдонидан узоқлаштира олмайди, ўз навбатида Райан Гиггзнинг жарима майдони ташқарисидан йўллаган зарбаси ҳам кучсиз чиқади. Бироқ Тедди Шерингем яқин масофадан дарвозани аниқ нишонга олган ҳолда ҳисобни тенглаштиради — 1:1.
«Манчестер Юнайтед» мувозанатни тиклаган вақтда таблодаги вақт 90:36 эди. Бу билан «Юнайтед» ўзи учун камида қўшимча бўлимларни нақд қилиб қўйганди.
Орадан кўп ўтмай инглиз клуби яна бурчак зарбасига эга бўлади, бироқ бу сафар Шмейхель жарима майдонига бормасликка қарор қилади. Яна Бекҳэм тўпни жарима майдонига узатади, Шерингем тўп йўналишини ўзгартиради ва Оле-Гуннар Сульшер уни дарвоза томон тўғирлаб қўяди — 2:1. «Манчестер Юнайтед» иккинчи голни урган вақтда таблода 92:17 сонлари порлаб турарди.
Қўшимча вақтларда ўтказиб юборилган иккита гол «Бавария» футболчиларини шок ҳолатига солиб қўяди: улар ўйинни давом эттиришни ҳам истамайди. Учрашув бош ҳаками Пьерлуижи Коллина уларни ўрнидан тургазади ва учрашувни давом эттиришга кўндиради. Бироқ немис клуби қолган вақтда ҳеч нарсага улгурмайди.
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @Daryo_Sport24’га обуна бўлинг!
Изоҳ (0)