Ўрта вазн тоифасида UFC собиқ чемпиони Майкл Биспинг енгил вазн дивизиони вақтинчалик чемпиони Жастин Гэтжининг амалдаги чемпион Ҳабиб Нурмагомедовга қарши жангдаги имкониятлари ҳақида гапирди.
«Агар Тони Фергюсон Жастин Гэтжига қарши жангни ўз фойдасига ҳал қила олганида бошқа гап эди. Унда Ҳабибни енгиш учун яхши имкониятлар мавжуд эди. Бироқ тақдир унинг йўлига ғов бўлди.
Жастин ҳам Ҳабибга қарши жангда яхши имкониятга эга. Хабарингиз бўлмаса шуни айтишим мумкин, Жастин — ажойиб курашчи, у штат чемпионлигини қўлга киритган. У рақибининг тейкдаунларини тўхтатади, жангда юқори ритм билан ҳаракат қилади, лоукикларни қўл орқали берилган оғир зарбалар билан қориштиради ва бунинг эвазига рақибини нокаутга учратишга ҳаракат қилади.
У Ҳабибнинг тейкдаунларини тўхтата олади. Эл Яквинтани ёдга олинг, у Ҳабибнинг кўплаб тейкдаунларига чап бериб қолганди. ‘Стойка’да эса Жастин самаралироқ. Натижа қандай бўлишини билмайман, бироқ жанг кўп нарсани ваъда қилмоқда. Биз Ҳабибнинг илк мағлубиятига гувоҳ бўлишимиз мумкин. Бу фикрлар Нурмагомедовнинг мағлубиятидан хурсанд бўлишимни англатмайди, чунки Ҳабибни ёқтираман ва унга мухлислик қиламан. Менга унинг ўзини тутиш услуби ёқади. Шунчаки, жанг ажойиб бўлишига ишонаман», — дейди Биспинг.
Жастин Гэтжи UFC 249 мусобақасида енгил вазн вақтинчалик чемпионлиги учун Тони Фергюсонга қарши жанг қилди ва бешинчи раундда рақибини нокаутга учратди. Эндиликда Гэтжи енгил вазн тоифаси чемпиони Ҳабиб Нурмагомедовга қарши жанг олиб боради. Мазкур тўқнашув 2020 йилниг сентябрь ёки октябрь ойида бўлиб ўтиши кутилмоқда.
Изоҳ (0)