Андижон вилоятининг Избоскан туманида 25 май куни «Андижон намунаси» асосида «Соғлом ҳаёт учун 5000 қадам» шиори остида пиёда юриш тадбири ташкил этилган. Оммавий тадбир акс этган суратлар туман ҳокимлиги матбуот хизмати томонидан эълон қилинди.
«Ўзбекистон Республикаси Президентининг Андижон вилоятига ташрифи чоғида Андижонлик фаоллар билан ўтказган йиғилишида аҳоли саломатлигини сақлаш, уларни соғлом турмуш тарзига риоя қилишлари учун ‘Андижон наъмунаси’ асосида ҳар куни кечки юришни ташкил этиш бўйича берган топшириқ ижросини таъминлаш, туман аҳолисини саломатлигини янада яхшилаш мақсадида Избоскан туманида ‘Соғлом ҳаёт учун 5000 қадам’ шиори остида пиёда юриш ташкил этилди», — дейилади туман ҳокимлиги матбуот хизмати хабарида.
Маълум бўлишича, 23 май куни Избоскан туманида яшовчи бир кишида коронавирус инфекцияси аниқланган.
Бемор билан мулоқотда бўлган 51 киши карантинга олинган. Уларнинг орасида оила аъзолари ҳам бор. Шу билан бирга, бемор билан алоқада бўлган 26 кишидан ҳам вирусологик таҳлил учун суртма намуналари олинган.
Соғлиқни сақлаш вазирлиги томонидан 25 май куни берилган маълумотларга кўра, Андижон вилоятида коронавирусга чалиниш бўйича жами 175 та ҳолат қайд этилган. Бу рақам 17 май кунидан буён ўзгаришсиз қолмоқда, вилоятда шу пайтгача 167 нафар бемор касалликдан тузалган.
Изоҳ (0)