Буюк Британиянинг AstraZeneca фармацевтика компанияси синовлар муваффақиятли ўтган тақдирда COVID-19 касаллигига қарши вакцинани кенг қамровли ишлаб чиқаришни жорий йилнинг сентябрь ойида бошлашни режалаштирмоқда. Айни пайтда мазкур вакцина устида Оксфорд университети билан ҳамкорликда иш олиб борилмоқда. Бу ҳақда «РИА Новости» хабар берди.
«Компания етказиб бериш бўйича дастлабки шартномаларни имзолади, камида 400 миллионта доза, бир миллиард доза ишлаб чиқариш бўйича имкониятни таъминлади ва дастлабки етказиб беришни 2020 йилнинг сентябрида бошлайди», — дейилади компания баёнотида.
«Биз вакцинани яратиш ва ишлаб чиқариш жараёнини тезлаштиришда кўрсатган кўмаги учун АҚШ ва Буюк Британия ҳукуматларига миннатдорчилик билдирмоқчимиз. Вакцинани тезда яратиш ва уни ҳамма фойдалана оладиган қилиш учун имкониятимиз даражасидаги барча ишни қилдик», — дейилади AstraZeneca раҳбари Паскал Сорионинг баёнотида.
Компания вакцинани яратиш учун АҚШ ҳукуматидан бир миллиард доллардан ортиқ маблағ олган.Хабар берилишича, июнь ойида Англияда ўтказилаётган клиник синовларнинг биринчи фазаси натижалари маълум бўлади. Агар синовлар муваффақиятли бўлса, улар бошқа давлатларда давом эттирилади. Ҳамма иш режа бўйича кетса, сентябрь ойида Буюк Британиянинг 30 миллион аҳолиси ёки мамлакат аҳолисининг ярмидан сал камроғи вакцинадан фойдаланиши мумкин бўлади.
Аввалроқ АҚШнинг Moderna компанияси коронавирусга қарши вакцинанинг клиник синовлари биринчи фазаси ижобий натижалар билан тугаётганини маълум қилган. Шунингдек, АҚШда коронавирусга қарши ДНК-вакцина синовдан ўтказилди.
Изоҳ (0)