Forbes ҳар йили тузадиган Россия миллиардерлари энг бой меросхўрларининг навбатдаги рейтингини тақдим этди. 2020 йилги рейтингда ҳар бир болага камида 2,25 миллиард доллардан тўғри келувчи 20 та оила ўрин олган.
Биринчи ўринни «Лукойл» президенти Вагит Алекперовнинг ягона ўғли Юсуф эгаллади. Унга 18 миллиард долларга тенг мерос тўғри келади. Отасининг сўзларига кўра, Юсуф ҳеч қачон «Лукойл»га раҳбарлик қилмайди. 2018 йилда компанияни бутунлай тарк этиб, ўз бизнеси — Plan B энергия ичимликларини ишлаб чиқариш билан шуғулланишни бошлади. 2019 йилнинг сентябрь ойида эса у иккинчи бизнес — реклама билан шуғулланувчи «Рақамли технология» компаниясини йўлга қўйди.
Иккинчи ўринни «Новатэк» ва «Сибур» компанияларининг асосий эгаси Леонид Михельсоннинг қизи Виктория ва 2015 йилда туғилган ўғли эгаллаган бўлиб, Forbes унинг исмини ошкор этмаган. Уларнинг ҳар бири 10,1 миллиард доллар маблағга мерсохўрлик қилади. Виктория Михельсон Нью-Йорк университетини битирган ва ўзини санъат соҳасига бағишлаган.
Учинчи ўринни УГМК (Ураль тоғ-металлургия компанияси) асосий акциядори бухоролик Искандар Маҳмудовнинг ўғли Жаҳонгир эгаллади. У 9 миллиард долларлик бойликнинг меросхўри ҳисобланади. Жаҳонгир Маҳмудов Лондон иқтисодиёт мактаби ва Hult бизнес-мактабини тугатган бўлиб, 2012 йилдан бери отаси билан ишлайди.
Россиянинг энг бой меросхўрлари бешлигидан, шунингдек, «Еврохим» ва СУЭК эгаси бўлган икки болали Андрей Мельниченконинг (ҳар бир бола учун 7 миллиард доллар) ва НЛМК раҳбарининг уч нафар фарзанди (ҳар бири 6,7 миллиард доллар) ўрин олди.
Рейтинг тузишда Forbes ҳар бир миллиардернинг бойлигини турмуш ўртоқлар улушларини ҳисобга олмаган ҳолда фарзандларининг сонига қараб тақсимлайди.
Изоҳ (0)