Эронда COVID-19’дан тузалганлар сони 100 минг нафардан ошди. Мамлакатда 10 мингга яқин тиббиёт ходимида коронавирус аниқланган

Эронда 129 минг нафар касалланган одам орасида 100 минг нафари COVID-19’дан тузалди. Бу ҳақда мамлакат Соғлиқни сақлаш вазирлиги расмий вакили Киануш Жаҳонпур хабар қилган.

Унинг сўзларига кўра, эпидемия бошланганидан бери касалланиш ҳолатларининг сони 129 341 тага етган (бир сутка ичида 2392 нафарга кўпайган), касаллик туфайли вафот этганлар эса 7249 нафарни (24 соат давомида 66 бемор ҳаётдан кўз юмган) ташкил қилмоқда.

Сўнгги кунларда Эронда касалланиш ҳолатларининг сони 2 мингдан пастга тушмай келмоқда, май ойи бошида коронавирусга чалингалар сони март—апрель ойларидаги кўрсаткичлардан анча пасайганди.

2 майда 802 киши касаллангани маълум қилинган, бироқ кейинги кунларда бу борадаги рақамлар ҳам юқорига қараб ҳаракатлана бошлаган. Антирекорд, яъни энг кўп касалланиш ҳолати 30 мартда кузатилган — бир сутка ичида 3186 киши коронавирус инфекциясини юқтириб олганди.

Эрон соғлиқни сақлаш вазири Саид Намакий ҳам Рамазон Ҳайити сабаб касалланиш ҳолатлари яна кескин кўпайишидан хавотирда эканини билдирган ва аҳолига саёҳатларга чиқмасликни тавсия қилганди.

Эронда касалланиш ҳолатлари ҳукумат томонидан карантин чекловлари юмшатила бошлаганидан сўнг яна орта бошлаган. Коронавирус тарқалиш хавфи паст бўлган мамлакатнинг «оқ» ҳудудларида масжидлар очилган. Бунда ижтимоий масофа сақлаш қоидаларига амал қилинади.

COVID-19’нинг ўчоғи бўлган Теҳронда кўчада сайр қиладиган фуқаролар сони кўпайган, бозор расталари ва дўконлар очилган, ёйма бозорлар фаолиятини бошлаган, лекин шунга қарамай оммавий спорт ва маданият тадбирларининг ўтказилишига ҳали рухсат берилмаган, ресторан ва кафелар ёпиқ, улар, асосан, буюртмани етказиб бериш хизматларини амалга оширмоқда.

«Коронавирусга чалинишнинг эҳтимоли тиббиёт соҳаси вакилларида нисбатан юқори, бироқ улар касаллик билан курашда жасорат намойиш қилмоқда. Шунга қарамай 10 мингга яқин нафар тиббиёт ходими COVID-19’га чалинган, айримлар инфекция асоратлари оқибатида ҳаётдан кўз юмган», — дейилади вазирлик расмий сайтида эълон қилинган маълумотда.

Вазир ўринбосари касалланган шифокорларнинг қанчаси коронавирусдан вафот этгани, уларнинг қачон ва қай тарзда касалликни юқтириб олгани ҳамда COVID-19’дан тузалган шифокорлар сонига аниқлик киритмаган.