COVID-19 пандемиясига қарши кураш бўйича комплекс чора-тадбирлар доирасида АҚШ ҳукумати Тараққиёт агентлиги (USAID) орқали Ўзбекистонга қўшимча 3 миллион доллар ажратади.
Фото: АҚШнинг Ўзбекистондаги элчихонаси матбуот хизмати
АҚШнинг Ўзбекистондаги элчихонаси хабарига кўра, шу тариқа АҚШ ҳукуматининг Ўзбекистонда коронавирусга қарши саъй-ҳаракатларни қўллаб-қувватлашда кўрсатган бевосита ёрдами 5,92 миллион долларни ташкил этмоқда. Бунинг тахминан 3,8 миллиони эса USAID ҳиссасига тўғри келади.
USAID ушбу қўшимча маблағни коронавирусга қарши кураш ва уни назорат қилишда лабораториялар ҳамда соғлиқни сақлаш ходимлари имкониятини кенгайтиришни давом эттиришга сарфлайди.
«COVID-19 тарқалишига қарши курашга қаратилган чора-тадбирларни қўллаб-қувватлаш билан бирга, USAID мамлакат иқтисодини диверсификация қилиш ва минтақавий савдони кучайтириш, саломатликка жиддий хавфларни бартараф этиш ҳамда аҳоли эҳтиёжларини қондиришда ҳукумат имкониятларини мустаҳкамлаш мақсадида Ўзбекистон ҳукумати билан биргаликда иш олиб бормоқда», — дейилади хабарда.
Эслатиб ўтамиз, февраль ойининг охирида АҚШ Ўзбекистонга коронавирус тарқалганда ишлатилиши учун мўлжалланган 600 тўплам шахсий ҳимоя воситаларини етказиб берган эди. 17 март куни АҚШнинг Ўзбекистондаги элчихонаси коронавирус тарқалишига тайёргарлик кўриши учун Ўзбекистон Санитария-эпидемиологик осойишталик агентлигига иккинчи хайрия ёрдами сифатида шахсий ҳимоя воситаларини топширганди. 2 апрель куни эса USAID Ўзбекистонга COVID-19 коронавирусига қарши курашда қўшимча кўмак бериши маълум қилинганди.
Шунингдек, АҚШ Касалликларни назорат қилиш ва олдини олиш маркази (CDC/CAR) Марказий Осиё ҳукуматларининг COVID-19’га қарши саъй-ҳаракатларини қўллаб-қувватлаш мақсадида ажратган 6,8 миллион доллардан 2,07 миллион доллари Ўзбекистонга берилиши маълум қилинган.
