Ижтимоий тармоқларда бодикамерасиз ЙПХ ходими фуқаро билан жанжаллашаётгани тасвирланган видео тарқалди. Навоий вилояти ИИБ матбуот хизмати видеотасвир бўйича муносабат билдирди.
Қайд этилишича, воқеа 21 май куни соат 17:10 ларда Навоий вилояти Учқудуқ туманидан содир бўлган. Зарафшон шаҳри йўналиши бўйича бир нафар йўловчи билан ҳаракатланиб келаётган Labo машинаси «Учқудуқ» постида хизмат олиб бораётган Миллий гвардия ходимлари томонидан дезинфекция чораларини кўриш мақсадида тўхтатилган ва постда юритилаётган журналга қайд этиш учун ҳайдовчидан унинг гувоҳномаси сўралган.
Ҳайдовчи эса Миллий гвардия ходимларига ушбу постдан ҳар кун ўтиб-қайтишини, ҳар сафар ҳужжатларини кўрсатмаслигини айтиб, улар билан тортишган. Шу вақтда постга хизматга жалб этилган Учқудуқ туман ИИБ ЙҲХГ маъмурий амалиёт инспектори катта сержант У.А. постда жойлашган хизмат хонасидан чиқиб келиб, ҳайдовчидан ҳужжатларини тақдим этишини сўраган.
Ҳайдовчи унга ҳужжатлари йўқлигини маълум қилганидан сўнг ЙПХ ходими уни машинадан тушишини, автомобили эса жарима майдонига қўйилишини айтган. Ҳайдовчи машинасидан тушганидан сўнг ЙПХ ходими жарима майдонига қўйиш мақсадида рул бошқарувига ўтирган. Шунда автомашина олд ўриндиғида ўтирган йўловчи ходимнинг ҳаракатларини видеотасвирга олишни бошлаб, ходимга нима сабабдан бодикамерасиз хизмат олиб бораётганлигини сўраб, унинг ҳаракатларини ижтимоий тармоқларга жойлаштиришини айтган ва уларни қўйиб юборишни сўраган. Ходим эса видеотасвирга олишига қаршилик кўрсатмоқчи бўлган.
Шундан сўнг ушбу транспорт воситаси ҳайдовчиси 1995 йилда туғилган ҳайдовчи А.К.га нисбатан Маъмурий жавобгарлик тўғрисидаги кодекснинг 194 ва 135-моддаларига кўра баённома расмийлаштирилиб, автомашинаси эвакуатор ёрдамида жарима майдонига қўйилган.
Хабарда таъкидланишича, шу куни А.У. хизматга чиқишидан олдин бодикамерасини навбатчилик қисмидан олган бўлса-да, ушбу ҳолат содир бўлган вақтда уни шу постда жойлашган хизмат хонасида унутиб қолдирган ва шовқинни эшитиб ташқарига югуриб чиққан.
Ҳолатни тасвирга олган автомашина йўловчиси 1998 йилда туғилган Б.М. 2020 йилнинг 10 апрель куни транспорт воситасини спиртли ичимлик таъсирида маст ҳолда бошқарганлиги сабабли Учқудуқ туман суди томонидан 6 ой муддатга ҳайдовчилик ҳуқуқидан маҳрум этилган.
Ҳозирги кунда мазкур ҳолат юзасидан хизмат текшируви ўтказилмоқда.
Изоҳ (0)