Ижтимоий тармоқларда ерда ётган эркак ва унинг атрофидаги одамларнинг тез ёрдамга қўнғироқ қилаётгани тасвирланган видео тарқалди. Видеодан англашилишича, фуқаролар ёрдам бериш учун тез ёрдам чақирган. Аммо тез ёрдам ўз вақтида етиб келмагани боис одамлар асабийлашиб, тез ёрдамга манзилни қайта-қайта тушунтиришга уринган.
Мазкур ҳолат юзасидан Андижон вилоят соғлиқни сақлаш бошқармаси муносабат билдирди.
«Рамазон ойининг улуғ кунларида нохуш воқеа юз берди. 2020 йил 20 май куни Андижон шаҳрининг Бобуршоҳ кўчасида велосипедда кетаётган фуқаро номаълум сабабларга кўра йиқилган. Атрофдаги инсонлар ушбу кўнгилсиз ҳолатни видеотасвирга олиб, ижтимоий тармоқларга жойлаштирган. Шу орқали тез ёрдам машинаси келмаётганлигидан шикоят қилган», — дейилади бошқарма муносабатида.
Бошқарма ахборот хизматининг таъкидлашича, шу куннинг ўзида вилоят ҳокимлиги, соғлиқни сақлаш бошқармаси, Республика шошилинч тиббий ёрдам илмий маркази вилоят филиали, суд-тиббий экспертиза бюроси, ИИБ масъуллари иштирокида тезкор ишчи гуруҳ тузилиб, ҳолат ўрганиб чиқилган.
Ўрганиш натижасига кўра, 20 май куни соат 12:10 га яқин Андижон шаҳрининг Бобуршоҳ кўчасида велосипеддан йиқилиб тушган эркак маълум муддат ҳушсиз ётган. Ушбу нохуш ҳолат бўйича тез ёрдамга икки маротаба қўнғироқ бўлган.
«Соат 12:14 да тез тиббий ёрдам машинаси чақирувни қабул қилиб, йўлга чиқаётганлигини хизмат кузатув камераларидан кўриш мумкин. Чақирувни қабул қилган врач Исмоил Каримов бошчилигидаги бригада соат 12:23 да воқеа жойига етиб борган. Видеолавҳада иккинчи маротаба хабар бераётган аёлнинг овози ва тез ёрдам машинаси келганлигини кўриш мумкин», — дейилади бошқарма ахборотида.
Таъкидланишича, тез ёрдам воқеа жойига етиб борганида фуқарода ўлим ҳолати белгилари аниқланган. Шундан сўнг шифокор томонидан 12:30 да ИИБга хабар берилган. Соат 12:44 да эса ИИБ ходими воқеа жойига етиб борган.
Андижон вилоят суд-тиббий экспертиза бюроси хулосасига кўра, фуқаро ўлимига сурункали юрак ишемик касаллиги сабаб бўлган. Мурда танасида йиқилиш билан боғлиқ ҳеч қандай жароҳат аниқланмаган.
Маълумот берилишича, марҳум 1951 йилда туғилган бўлиб, яқинларининг сўзларига кўра, икки марта юрак хуружини бошдан ўтказган.
Изоҳ (0)