AQSh O‘zbekistonga COVID-19 koronavirusiga qarshi kurashda qo‘shimcha yordam ko‘rsatadi

AQSh hukumatining Xalqaro rivojlanish bo‘yicha agentligi (USAID) O‘zbekistonga COVID-19 koronavirusiga qarshi kurashda qo‘shimcha ko‘mak berilishini e’lon qildi. Bu haqda AQShning O‘zbekistondagi elchixonasi axborot xizmati xabar bergan.

AQSh davlat kotibi Maykl Pompeo 26-mart kuni COVID-19 koronavirusi pandemiyasiga qarshi kurashayotgan 64 ta mamlakatga hukumat tomonidan 274 million dollar ajratilishi va ushbu mablag‘ evaziga favqulodda zarur buyumlar, tibbiyot jihozlari va gumanitar yordam jo‘natilishini ma’lum qilgandi.

USAID katta hajmdagi testlash laboratoriya tizimlari, tibbiyot muassasalarida infeksiyani nazorat va profilaktika qilish, epidemik nazoratni yaxshilash, COVID-19 bilan kasallanganlarni tezkor aniqlash, bemorlar hisobini yuritish, virus haqidagi yolg‘on axborotlar tarqalishiga qarshi kurashishga davlat hamda tibbiyot muassasalarini jalb qilish ishlariga mablag‘ ajratadi.

Qo‘shma Shtatlar boshqa donor tashkilotlarni ham COVID-19 ga qarshi jahon miqyosidagi kurashga o‘z hissasini qo‘shishga chaqiradi, deyilgan elchixona axborotida.

Avval supermarketda kartoshka bilan nonni bitta savatga solib, o‘zbeklarga sog‘liq tilagan AQSh elchisi muhokamalarga sabab bo‘lgani, AQShning O‘zbekistonga koronavirusga qarshi kurash uchun shaxsiy himoya vositalarining 2-partiyasini topshirgani haqida xabarlar berilgan.