Ҳаётда ажойиб тасодифлар ва ҳеч ким кутмаган ҳодисалар бўлиб туради. Баъзан ўзи топиб олган қимматбаҳо ва ноёб нарсаси эвазига бойиб кетган одамлар ҳам учрайди. Қуйида ана шундай омадли одамлар ҳақида Mixnews сайтида эълон қилинган мақолани ҳавола этамиз.
5,5 кг тош босадиган табиий олтин бўлаги
Австралиядаги Балларат шаҳридаги қумлоқ соҳилда металл излагич асбоб билан қидирув олиб борган ҳаваскор олтин изловчи қумдан 60 см чуқурликда ётган ғалати нарсани топиб олади. Аввалига у мазкур буюмни автомобиль детали бўлса керак деб ўйлаган, лекин кавлаб кўриб, унинг олтин эканини аниқлаган ва кавлагани сари бўлак тобора каттароқ экани ойдинлашган.
Ўз исмини ошкор қилинишни истамаган ушбу омадли олтинтопар мазкур бўлакни баҳолашга олиб борганида унинг вазни 5,5 кг чиқиши маълум бўлди. Бу мазкур ҳудудда изланишлар олиб борилиши тарихида аниқланган энг йирик табиий олтин бўлагидир. Унинг қиймати 300 минг АҚШ доллари деб баҳоланган ва бу нарх олтинтопарга профессионал металл излаш асбоби харид қилиш харажатларига кифоя қилган ҳамда унинг бойиб кетишга сабаб бўлган.
Гараждан топилган 1966 йилги Ferrari 330 GT
АҚШнинг Вайоминг штатида бир одам 285,5 минг долларга яхшигина уй харид қилади. Одатдагидек, бу уйда ҳам гараж бор эди ва қандайдир номаълум сабабга кўра, олди-сотди вақтида мазкур гараж даллолнинг ҳам, харидорнинг ҳам эътиборидан четда қолган. Кўчмас мулкнинг янги эгаси гаражни очиб кўрганида ҳайрати кучли бўлгани аниқ. У ерда 1966 йилда ишлаб чиқарилган ва деярли идеал ҳолатда бўлган Ferrari 330 GT турарди! Мазкур автомобилнинг тахминий баҳоси 500 минг доллар деб баҳоланган. Афтидан, уйнинг аввалги эгаси ўта паришонхотир одам бўлган шекилли.
Ҳовлидан топилган Стаффордшир хазинаси
2009 йилнинг 5 июль санасида англиялик фермер Терри Герберт ўзининг эски металл излагич асбоби билан уйи яқинида қизчаси йўқотиб қўйган узукни излагани чиқади. Лекин узукнинг ўрнига у 1 500 дона тилла ва кумуш буюмлардан иборат хазина топиб олади. Кейинчалик олимлар ушбу буюмлар эрамизнинг VII асрига оид эканини аниқлаган. Топилманинг умумий вазни 7,5 кг чиққан, баҳоси эса 5,3 миллион долларни ташкил қилган. Топилган хазина давлатга тегишли экани сабабли фермерга унинг қийматининг тенг ярми миқдорида мукофот пули берилган. Ишончимиз комилки, омадли фермер бундан, албатта, кўнгли тўлган.
Эски курсидан топилган хазина
Шотландиянинг Биггар шаҳарчасида яшовчи эр-хотин, тахминан, беш фунт нархга таъмирталаб эски стул сотиб олган эди. Уни таъмирлашга пул ажратишгунича эса улар стулни томга олиб чиқиб қўйган ва ўша ерда олти йил қолиб кетган. Олти йил ўтиб, унинг эгаси таъмирлашга қарор қилади ва қопламасини ечиб олгач, катта ҳайрат билан бриллиантлар ва қимматбаҳо тошлар билан безатилган зийнат тақинчоқларини топиб олади. Оила бошлиғи аввалига топган нарсаси ҳақида хотинига индамаган, унга аввалига қимматбаҳо тошлари бор узук, кейин эса сирға ҳадя қилган. Фақат 2016 йилдагина у хотинига бу тақинчоқларнинг келиб чиқиши ҳақида айтиб берган. Экспертларга мурожаат қилган Милнер-Браунлар оиласи уларнинг нархи 5 минг доллар атрофида эканини билиб олган.
Пианинога яширилган хазина
61 ёшли уста Мартин Бэкхаус Англиядаги Bishop’s Castle Community College коллежига Хэмингслар оиласи совға қилган пианинони таъмирлаш учун таклиф қилинган эди. Таъмирлаш жараёнида уста ушбу мусиқа асбоби клавишлари остидан еттита каноп халтачаларга солинган олтин тангалар топиб олади. Ушбу тангалар қиролича Виктория замонасида муомалага чиқарилган бўлган. Экспертлар ушбу тангаларнинг умумий қийматини 640 минг доллар деб баҳолаган.
Хазинани ким ва қачон яширгани номаълум, лекин пианино таъмирчиси бўлган уста уни топгани учун давлатдан олти хонали сон билан ёзиладиган миқдордаги пул мукофоти олди. Пианинога охирги 33 йил мобайнида эгалик қилган оила эса бу хазина ҳақида ҳеч нарса билмаган ва ўзларининг мазкур хазинага эгалик қилиш ҳуқуқини қўлдан бой берган.
Олтин уй
Номи сир қолишни истаган бир французга Нормандияда жойлашган уй мерос қолган эди. Янги эгаси уйни кўздан кечириш асносида стул остига қотириб қўйилган ва ичида тилла тангалар бўлган кичик бир қутичани топиб олади. Виски идишларини сақлаш учун мўлжалланган яна бир қутида эса ундан ҳам кўп олтин топилган. Ундан кейин эса меросхўр олтин қуймаларидан иборат уюмга дуч келган. Баҳоловчилар ҳамма олтинларни тортиб кўриб, уларнинг умумий қиймати 3,7 миллион доллар чиқиши ҳақидаги тўхтамга келган. Лекин буни топган одамнинг қувончи узоққа чўзилмади, чунки Франция қонунларига мувофиқ у мерос қийматидан 45 фоиз солиқ тўлаши керак.
Энг катта опал матрица
2011 йилда Жанубий Австралиядаги опал майдонидан тарихдаги энг катта опал матрицаси топилган. Бу тош 55 минг карат (11 кг) соф опалдан иборат. Тошни Стюарт Хьюз исмли дизайнер топиб олган. Унинг нархи 1 миллион доллар атрофида деб баҳоланган.
Эски-тускилар бозоридан харид қилинган Фаберже тухуми
Бир америкалик одам эски-тускилар бозоридан 14 минг долларга ичида марварид доналари билан безатилган металл тухум сотиб олади ва уни кейинчалик янада қимматроқ нархга сотиб фойда қилишни режа қилади. Лекин уни сотиб олишни истовчи харидорлар ҳа деганда топилавермайди. Кейин ўша одам ушбу нарсанинг тарихи билан қизиқиб, ичида Vacheron Constantin ёзуви борлигини кўриб, ушбу ёзувни Google қидирув тизимидан излайди. Интернетдан у Фаберже бўйича экспертнинг мақоласига дуч келади ва буюмни профессионалларга кўрсатишга қарор қилади.
Экспертларнинг аниқлашича, ушбу тухум император Александр III томонидан Карл Фабержега буюртма қилинган пасха тухуми экан ва уни император ўз рафиқаси Мария Федоровнага 1887 йил пасха байрамига совға қилган экан. Тухум қай тарзда Америкага бориб қолгани эса жумбоқ бўлиб қолган. Лекин уни топган ва натижада 33 миллион долларлик бойлик орттирган омадли одам учун бунинг аҳамияти йўқ бўлса керак.
Томдан топилган пуллар
Юта штатида яшовчи Жош Феррин ўзининг устахонаси шифтидан қандайдир гилам бўлаги осилиб турганини кўриб қолади. У гилам чеккасидан тортиб кўрса, чордоққа ўтиш туйнуги очилади. Бу туйнукдан томга ўтиб, у ерда бир неча металл идишчалар ичида ип билан боғланган ҳолда қадоқлаб қўйилган бир неча пачка пул топиб олган. У кейин ичи пул билан лиқ тўлдирилган бундай қутилардан яна еттитасини топади ва бу ҳам ҳали ҳаммаси эмас эди.
Томдан ўша одам яна иккита катта ахлат қопи ичида тўла нақд пул топган. У ҳаммаси бўлиб, 45 минг доллар нақд пул топиб олган эди. Жош фикр қилиб кўриб, пулларни устахонанинг аввалги эгасига қайтариш керак деган тўхтамга келади. Шу сабабли ҳам у уларга қўнғироқ қилиб, келиб кетишларини илтимос қилади. Албатта, устахонанинг аввалги эгалари бундан лол қолган. Маълум бўлишича, уларга уй оталаридан мерос қолган бўлган ва оталари пулларни яшириб юрган экан.
Изоҳ (0)