Toshkentda Nexia haydovchisi bir necha bolani urib yuborgani yuzasidan tergov deyarli yakunlangani ma’lum qilindi

Toshkentning Yunusobod tumani, 11-dahasida joriy yil 4-iyun kuni ro‘y bergan YTH — Nexia haydovchisi bir necha bolani urib yuborishi oqibatida o‘smir A.G. halok bo‘lgani yuzasidan tekshiruv davomida birinchi instansiya tergovi tomonidan qator kamchiliklarga yo‘l qo‘yilgan. Bu haqda Ichki ishlar vazirining o‘rinbosari — Tergov departamenti boshlig‘i Doniyor Toshxo‘jayev brifing chog‘ida ma’lum qildi, deya xabar beradi “Gazeta.uz”.

Brifingda o‘smirning yaqinlari, guvohlar, tergovchi va gumonlanuvchi Larisa T.ning himoyasi ishtirok etdi. Tadbir bir daqiqa sukut saqlash bilan boshlandi.

Toshxo‘jayevga ko‘ra, tergov jabrdiyda tomonni videoregistrator yozuvi bilan tanishtirishdan bosh tortgan, tergovga qadar tekshiruvni tezda yakunlagan va ishni prokuraturaga oshirgan.

Halok bo‘lgan o‘smirning tog‘asi Mixail Axperjanyansning Facebook ijtimoiy tarmog‘i orqali Ichki ishlar vaziriga murojaatidan so‘ng IIV rahbari jabrdiyda tomon bilan bog‘lanish va vaziyatga oydinlik kiritish yuzasidan ko‘rsatma bergan. 28-avgust kuni IIV Tergov departamenti qo‘shimcha tekshiruvga kirishgan.

Doniyor Toshxo‘jayevning aytishicha, jabrdiyda tomon videoregistrator yozuvida montaj bo‘lgani, guvohlar avtomobil bolalar tomon uch marotaba bostirib borganini ko‘rganini da’vo qilgan.

“Bunday holatda ish qasddan bo‘lmagan jinoyat sifatida baholanmaydi. Bu yerda qasddan qotillik alomatlari sezilmoqda. Holatga aniqlik kiritish uchun tergov harakatlarini olib borish, ekspertiza tayinlash, shaffoflikni ta’minlash talab etiladi. Tergov esa bunday qilmagan”, — qo‘shimcha qildi Toshxo‘jayev.

Vazir o‘rinbosarining bildirishicha, aniqlangan kamchiliklar va tergov qoidalarining buzilishi sababli uch nafar xodim ishdan bo‘shash haqida ariza yozgan, bir nafarining lavozimi pasaytirilgan.

Doniyor Toshxo‘jayev hozirda tergov 95 foizga yakunlanganini ma’lum qildi. Tergovchilar bir necha guvohni qaytadan so‘roq qilishi va gumonlanuvchining boshqa raqamli telefonidan amalga oshirilgan qo‘ng‘iroqlarni tekshirib ko‘rishi kerak. Tergov tamom bo‘lganidan so‘ng ish sudga oshiriladi.