Jinoyat ishlar bo‘yicha Toshkent shahar Yunusobod tuman sudida 2019-yilning yozida bir o‘smirni mashinasida bosib ketib, uning o‘limiga sababchi bo‘lgan ayol ustidan o‘tkazilgan sud ishi o‘z yakuniga yetdi. Avtomobilni boshqargan Larisa Tolmachyova aybdor deb topildi va u to‘rt yilga ozodlikdan mahrum qilindi. Bu haqda Oliy sud matbuot xizmati rahbari Aziz Obidovga tayanib, “Gazeta.uz” xabar berdi.
Eslatib o‘tamiz, Larisa Tolmachyova Nexia-3 avtomobilida 2019-yil 4-iyun kuni 12 yoshli A.G., I.S., va Ya.S.ning ustiga yurib ketgandi. Olingan jarohatlar natijasida A.G. voqea joyida vafot etgan, I.S. oyog‘idan olgan jarohat bilan kasalxonaga yotqizilgan. Ya.S.ga esa ambulator yordam ko‘rsatilgan.
Sud jarayoni sudya Elza Shamsutdinova raisligida o‘tdi. Dastabki tergov organi tomonidan sudlanuvchi O‘zbekiston Respublikasi Jinoyat kodeksining 266-moddasi 2-qismida (Transport vositasi harakati yoki xavfsizligi qoidalarini buzish) nazarda tutilgan jinoyatni sodir etganlikda ayblangan.
Jinoyat ishi materiallariga ko‘ra, Larisa Tolmachyova 2019-yil 4-iyun soat 18:26 da Nexia-3 rusumli shaxsiy avtomobilni boshqara turib, Toshkent shahar Yunusobod tumani 11-mavzedagi 5, 6, 7-uylar o‘rtasidagi yo‘lda harakatlangan.
Qayd etilishicha, transport vositasi harakati yo‘nalishini o‘ng tomonga o‘zgartirgan Larisa Tolmachyova yo‘l chetida turgan, 2007-yilda tug‘ilgan G.A., I.S., Ya.S. va 2006-yilda tug‘ilgan F.R.ni ko‘rgan. Biroq Larisa Tolmachyova harakatni davom ettirib, Yo‘l harakati qoidalarini qo‘pol ravishda buzib, beparvolik sababli G. A., I. S., Ya. S.ning ustiga avtomobilda yurib ketgan.
Hodisa natijasida voyaga yetmagan G.A. olingan tan jarohatlaridan vafot etgan, jabrlanuvchi Ya.S. yengil tan jarohatlari olgan. Jabrlanuvchi I.S. esa o‘rta darajadagi tan jarohatlari olgan.
Qayd etilishicha, sud jarayoni davomida sudlanuvchi, guvohlar, jabrlanuvchilar va ularning qonuniy vakillari eshitilgan, dalillar o‘rganib chiqilgan va sudlanuvchining himoyasi tomonidan keltirilgan ma’lumotlar tekshirilgan.
Sud jinoiy ish materiallarini har tomonlama va to‘liq o‘rganib chiqib, Larisa Tolmachyovani O‘zbekiston Respublikasi Jinoyat kodeksining 266-moddasi 2-qismida Transport vositasi harakati yoki xavfsizligi qoidalarini buzish) nazarda tutilgan jinoyatni sodir etganlikda aybdor deb topdi. Sudning 2020-yil 18-maydagi qarori bilan Larisa Tolmachyovaga transport vositasini boshqarish huquqidan uch yilga mahrum qilgan holda to‘rt yil muddatga ozodlikdan mahrum qilish jazosi tayinlandi. Jazoni koloniyada o‘tash belgilandi va u 2019-yil 6-iyundan boshlab hisoblanishi belgilandi.
Jinoyat ishlari bo‘yicha Yunusobod tuman sudining mazkur qarori ustida 10 kun ichida shikoyat yoki protest kiritish mumkin, mahkum va jabrlanuvchilarning qonuniy vakillari qaror nusxasini olganidan keyin 10 kun ichida jinoiy ishlar bo‘yicha Toshkent shahar sudining appelyatsiya instansiyasiga, hukm qonuniy kuchga kirgach esa jinoiy ishlar bo‘yicha Toshkent shahar sudining kassatsiya instansiyasiga murojaat qilishi mumkin.
Avvalroq mazkur voqea yuzasidan olib borilgan tergov jarayonlari va ochiq holda davom etayotgan sud ishining yopiq deb e’lon qilingani haqida xabarlar berilgandi.
Izoh (0)