Қирғизистонда ўтган бир сутка ичида яна 21 кишида коронавирус инфекцияси аниқланди, деб хабар беради «РИА Новости».
«17 май ҳолатига кўра, яна 21 кишида COVID-19 қайд этилди», — дейди мамлакат тезкор штаб вакили.
Унинг сўзларига кўра, касалликка чалинганларнинг уч нафари — тиббиёт ходимлари.
Шундай қилиб, Қирғизистонда коронавирусга чалинганлар сони 1138 кишига етди, уларнинг 251 нафари — тиббиёт ходимлари. Ҳозирга қадар 14 киши коронавирус қурбонига айланган, 801 нафар бемор эса даволанишга муваффақ бўлган. Республикада пандемия бошланганидан буён коронавирусга 80 мингдан ортиқ тест ўтказилган.
Эслатиб ўтамиз, 4 май куни Ўзбекистон Президенти Шавкат Мирзиёев Қирғизистон президенти Сўронбой Жээнбеков билан телефон орқали мулоқот қилиб, коронавирусга қарши курашдаги ҳамкорлик масалаларини муҳокама қилганди.
Қозоғистонда коронавирусга чалинганлар сони 6 минг кишидан ошиб кетди, ўтган бир сутка давомида уларнинг сони 307 кишига кўпайган.
Таъкидланишича, ўтган бир сутка давомида қайд этилган касалланиш ҳолатларининг аксарияти Чимкент ҳисобига тўғри келмоқда — 77 бемор (ўсиш 28,6 фоиз). Бутун мамлакат бўйлаб COVID-19’га чалинганлар сони 6157 кишини ташкил этмоқда.
Давлат комиссияси қошидаги тезкор штаб маълумотларига кўра, ҳозирга қадар мамлакатда 34 киши коронавирус қурбонига айланган, 2980 бемор даволанишга муваффақ бўлган.
Ўзбекистонда 17 май соат 10:00 ҳолатига кўра, коронавирус инфекцияси қайд этилганлар сони 2741 нафарга етди. Мамлакатда коронавирусдан тузалганларнинг сони эса 2213 нафарга етган, 11 нафар бемор эса инфекция асоратлари оқибатида вафот этган.
Изоҳ (0)