Ўзбекистон Бош вазири ўринбосари − инвестициялар ва ташқи савдо вазири Сардор Умурзоқов Туркманистон Вазирлар Маҳкамаси раисининг ўринбосари — ташқи ишлар вазири Рашид Мередов билан видеоконференцалоқа орқали музокаралар ўтказди. Бу ҳақда вазирлик матбуот хизматига таяниб, «Дунё» агентлиги хабар берди.
Таъкидланишича, учрашув давомида савдо-иқтисодий, инвестиция, транспорт-логистика ва маданий-гуманитар соҳалардаги икки томонлама ҳамкорликнинг жорий ҳолати ва истиқболлари муҳокама қилинган.
Хусусан, 2020 йилнинг иккинчи ярмида Тошкентда икки томонлама ҳамкорлик масалаларини биргаликда ҳал этиш учун самарали платформа сифатида ўзини кўрсатган савдо-иқтисодий, илмий-техникавий, маданий-гуманитар ҳамкорлик бўйича ҳукуматлараро комиссиянинг навбатдаги йиғилишини ҳамда Ўзбекистон—Туркманистон ишбилармонлик кенгашининг биринчи йиғилишини ўтказиш долзарблиги таъкидланди.
«Ўзбекистон—Туркманистон чегарасида чегара савдо зоналарини яратиш масалалари кўриб чиқилди, бу эса икки мамлакат бозорларида талабга эга қишлоқ хўжалиги ва маиший техника, озиқ-овқат маҳсулотлари, қурилиш материаллари ҳамда нефть-кимё маҳсулотлари етказиб бериш орқали товар айланмасини сезиларли даражада ошириши мумкин», — дейилади хабарда.
Маълумот учун, 2019 йил якунлари бўйича Ўзбекистон ва Туркманистон ўртасидаги товар айланмаси 78 фоизга кўпайди, сўнгги уч йил мобайнида эса ўзаро савдо ҳажми 3 баробардан зиёд ошган.
Шунингдек, учрашувда углеводород хом ашёси конларини ўзлаштириш, қишлоқ хўжалиги машинасозлиги ва қурилиш материалларини биргаликда ишлаб чиқаришни ташкил этиш соҳаларида инвестиция ва саноат ҳамкорлигининг йирик истиқболлари ҳам қайд этилган.
Бундан ташқари, томонлар икки мамлакатда халқаро конференциялар, форумлар ва бошқа тадбирларни ташкил этиш орқали маданий-гуманитар соҳадаги ҳамкорликни кенгайтириш имкониятлари муҳокама қилинди.
Музокаралар якунида муҳокама этилган йўналишлар доирасида ўзаро манфаатли лойиҳа ва ташаббусларни илгари суриш ва амалга ошириш бўйича қўшма ишчи гуруҳ тузиш бўйича келишувга эришилган.
Изоҳ (0)