Тошкентдаги Versal ресторани яна сотувга қўйилди

Давлат активларини бошқариш агентлигининг ҳудудий бошқармаси Тошкент шаҳридаги Versal ресторанини аукцион савдоларига қўйди. Бу ҳақда Давлат активларини бошқариш агентлигининг ахборот хизмати хабар қилган.

Сотувдан кўзланган мақсад — хусусийлаштириш, сабаби ресторан «Муниципиал активларни бошқариш маркази» ДУКнинг таъсислигидаги «Тантана сервис» МЧЖга тегишли.

Бино 0,33 гектар майдонни эгаллаган ва қурилиш майдони 6,5 минг квадрат метрни ташкил қилади. Бино фундаменти бетондан ва ўзи пишган ғиштдан қурилган. Газ, сув ва электр тармоқлари мавжуд.

Versal’нинг бошланғич нархи — 34,6 миллиард сўм. Савдоларда иштирок этиш учун 1,7 миллиард сўм миқдорида закалат пули ўтказиш талаб қилинади. Лотда инвестицион мажбуриятлар белгиланмаган.

Аризалар 13 июнгача қабул қилинади, савдолар эса 16 июнда ўтказилади.

Versal аукционга биринчи марта қўйилаётгани йўқ, 2011 йилда «Алп Жамол банк»ни тугатиш комиссияси ресторанни суд қарори асосида аукционга қўйганди. Ўшанда тўйхонанинг бошланғич нархи тахминан 37,5 миллиард сўм деб белгиланган.

2018 йилда Versal ресторани Tashkent City қурилиши сабаб бузилган Ezidyor’га эгалик қилган Grand Duet компаниясига берилиши мумкинлиги ҳақида гап-сўзлар тарқалган.

Якунда компанияга Мирзо Улуғбек туманидаги Саёҳат ресторани насиб қилди. «Саёҳат» ҳам 2011 йилда «Алп Жамол банк» иши туфайли аукционда савдога қўйилган тўйхоналардан бири.