Навоийда 2,5 километрлик сув қувурларини ўғирлаб, комбинатга қарийб 200 млн сўм зарар етказган шахслар қамоққа олинди

Навоий кон-металлургия комбинати ҳудудидаги сув қувурларини ўғирлаган шахслар қамоққа олинди. Бу ҳақда ИИВ ҳузуридаги Тергов департаменти хабар қилган.

9 февралдан 14 февралга қадар бўлган вақт оралиғида номаълум шахслар Навоий кон-металлургия комбинати Ташқи сув таъминоти бошқармаси ҳисобидаги «Караката» насос станциясига қарашли темир сув қувурларининг Конимех тумани «Караката» овули ҳудудидан ўтган қисмидан 2 457 метр бўлган темир сув қувурларини ернинг устки қатламига чиқиб очилиб қолган жойларидан кесиб олиб, яширин равишда талон-торож қилиб, комбинатга жами 196 959 116 сўмлик моддий зарар етказган.

Ҳолат юзасидан Конимех тумани ИИБ ҳузуридаги Тергов гуруҳи томонидан Жиноят кодексининг 169-моддаси 4-қисми «а» банди (Жуда кўп миқдордаги ўғрилик) билан жиноят иши қўзғатилган.

Олиб борилган тергов ҳаракатлари давомида мазкур жиноятни муқаддам судланган 33 ёшли Ш.О., 34 ёшли Ф.К. ва Б.Р. содир этгани аниқланган. Жиноят иши бўйича уларга тегишли модда билан айб эълон қилиниб, қамоққа олиш тарзидаги эҳтиёт чораси қўлланилган.