Шавкат Мирзиёев фуқароларнинг Тошкент шаҳри ва вилоятида прописка қилиниши бўйича қонунни имзолади

Шавкат Мирзиёев Тошкент шаҳри ва Тошкент вилоятида доимий прописка қилиниши лозим бўлган шахслар — Ўзбекистон Республикаси фуқаролари тоифаларининг рўйхати тўғрисида Ўзбекистон Республикаси қонунига ўзгартириш ва қўшимчалар киритиш ҳақидаги қонунни имзолади. Бу ҳақда «Ўзбекистон 24» телеканалида хабар берилган.

Қонунга кўра, қуйидаги асосий ўзгаришлар тасдиқланган:

• «прописка» тушунчаси бекор бўлиб, ўрнига «доимий яшаш жойига рўйхатга олиш» тушунчаси киритилди;
• эр-хотиннинг никоҳдан кейин бир йил давомида биргаликда яшаш шарти ва бир йил ичида никоҳ бекор қилинганда прописка йўқотилиши ҳақидаги қоида чиқариб ташланди;
• иш жойидан доимий рўйхатга олинганлар ишдан кетгандан кейин ҳам пропискасини йўқотмайди;
• Тошкентда жойлашган давлат ташкилотларида 5 йил муддат мобайнида узлуксиз меҳнат фаолиятини юритаётган мутахассислар мазкур ҳудудларда доимий яшаш жойи бўйича рўйхатга олинади.

«Прописка тизимини ислоҳ қилишга оид қонуннинг имзоланиши узоқ кутилган янгилик эканини алоҳида таъкидлаш лозим. Мазкур масала 2020 йил учун тасдиқланган давлат дастури лойиҳаси ҳамда ушбу қонуннинг жамоатчилик муҳокамасида фуқароларнинг фаол иштирок этганини алоҳида қайд этиш лозим,» — дея қонуннинг имзоланишига шарҳ берган «Тараққиёт стратегияси» маркази ижрочи директори Элдор Туляков.2020 йил 4 апрелда БМТ Инсон ҳуқуқлари қўмитаси Ўзбекистонга «прописка» тизими борасида тавсия бергани, 5 апрелда Ўзбекистонда фуқароларни «прописка»га олиш тизимида жиддий ўзгаришлар кутилаётгани, 21 апрелда Шавкат Мирзиёевнинг Тошкент шаҳри ва вилоятига доимий прописка қилишни соддалаштириш ҳақидаги фармонни имзолагани, 29 апрелда Қонунчилик палатаси депутатлари прописка тизимини ислоҳ қилиш тўғрисидаги қонунни маъқуллагани, 12 май куни эса сенаторлар прописка тизимига киритиладиган ўзгаришларни маъқуллагани ҳақида хабарлар берилган.