Shavkat Mirziyoyev fuqarolarning Toshkent shahri va viloyatida propiska qilinishi bo‘yicha qonunni imzoladi

Shavkat Mirziyoyev Toshkent shahri va Toshkent viloyatida doimiy propiska qilinishi lozim bo‘lgan shaxslar — O‘zbekiston Respublikasi fuqarolari toifalarining ro‘yxati to‘g‘risida O‘zbekiston Respublikasi qonuniga o‘zgartirish va qo‘shimchalar kiritish haqidagi qonunni imzoladi. Bu haqda “O‘zbekiston 24” telekanalida xabar berilgan.

Qonunga ko‘ra, quyidagi asosiy o‘zgarishlar tasdiqlangan:

• “propiska” tushunchasi bekor bo‘lib, o‘rniga “doimiy yashash joyiga ro‘yxatga olish” tushunchasi kiritildi;
• er-xotinning nikohdan keyin bir yil davomida birgalikda yashash sharti va bir yil ichida nikoh bekor qilinganda propiska yo‘qotilishi haqidagi qoida chiqarib tashlandi;
• ish joyidan doimiy ro‘yxatga olinganlar ishdan ketgandan keyin ham propiskasini yo‘qotmaydi;
• Toshkentda joylashgan davlat tashkilotlarida 5 yil muddat mobaynida uzluksiz mehnat faoliyatini yuritayotgan mutaxassislar mazkur hududlarda doimiy yashash joyi bo‘yicha ro‘yxatga olinadi.

“Propiska tizimini isloh qilishga oid qonunning imzolanishi uzoq kutilgan yangilik ekanini alohida ta’kidlash lozim. Mazkur masala 2020-yil uchun tasdiqlangan davlat dasturi loyihasi hamda ushbu qonunning jamoatchilik muhokamasida fuqarolarning faol ishtirok etganini alohida qayd etish lozim,” — deya qonunning imzolanishiga sharh bergan “Taraqqiyot strategiyasi” markazi ijrochi direktori Eldor Tulyakov.2020-yil 4-aprelda BMT Inson huquqlari qo‘mitasi O‘zbekistonga “propiska” tizimi borasida tavsiya bergani, 5-aprelda O‘zbekistonda fuqarolarni “propiska”ga olish tizimida jiddiy o‘zgarishlar kutilayotgani, 21-aprelda Shavkat Mirziyoyevning Toshkent shahri va viloyatiga doimiy propiska qilishni soddalashtirish haqidagi farmonni imzolagani, 29-aprelda Qonunchilik palatasi deputatlari propiska tizimini isloh qilish to‘g‘risidagi qonunni ma’qullagani, 12-may kuni esa senatorlar propiska tizimiga kiritiladigan o‘zgarishlarni ma’qullagani haqida xabarlar berilgan.