Футбол бўйича А Серия баҳслари қачондан давом эттирилиши маълум бўлди

Футбол бўйича Италия чемпионати баҳслари 13 июндан давом эттирилади. Бу борада А Серия ассамблеаси йиғилишида қарор қабул қилинган.

Қарор Италия ҳукумати ва футболчиларни тиббий ҳимоя қилиш қоидаларига мувоффиқ тарзда чиқарилган.

Италияда 4 майдан якка ҳолдаги машғулотларга, 18 майдан эса гуруҳ машғулотларига рухсат берилган.

Қайд этиш жоиз, Италияда Бундеслигадан фарқли равишда тиббиёт протоколидаги қоидалар кескинроқ. Биргина коронавирусга чалиниш ҳолати мусобақанинг муддатидан аввал якунланишига олиб келади. Италия клублари немис протоколини намуна тарзида олишини хоҳлаган, бироқ ҳукумат уни етарли даражада хавфсиз эмаслигини билдирган. Бундан ташқари клубларга гуруҳ машғулотлари бошлангандан кейин 15 кун мобайнида изоляцияда бўлиш тавсия қилинган.

Аввалроқ Германия, Португалия, Чехия ва бошқа бир қатор чемпионлатларда мавсум давом этиши хабар қилинганди.

Эслатиб ўтамиз, 26-турга келиб тўхтаб қолган. Мусобақа жадвалида «Ювентус» 63 очко тўплаган ҳолда биринчи ўринда бормоқда, ундан бир очко кам жамғарган «Интер» кейинги поғонани банд этган.