Роналду Ўзбекистон MMA ассоциацияси либосида кўриниш берди. Бунинг учун пул тўландими ёки Ҳабиб Нурмагомедов ёрдам бердими?

Бир неча кун олдин 5 карра «Олтин тўп» соҳиби, «Ювентус» ҳужумчиси Криштиану Роналду Ўзбекистон MMA ассоциацияси логотипи туширилган либосда кўриниш берди.

Instagram’да 218 миллионлик обуначига эга Роналду ўша либосда болалари билан бирга тушган суратига «Энг буюк муҳаббат» дея изоҳ қолдирди. Шундан сўнг Ўзбекистон MMA ассоциацияси ҳам ўзининг Instagram’даги саҳифасида бир пост қолдирди. Унда қуйидаги жумлалар акс этганди: «Криштиану Роналду ‘UMMAA.UZ’ футболкасида. Ҳар доимгидек у тўғри танлов қилди».

Бу воқеалардан кейин ижтимоий тармоқларда Ўзбекистон MMA ассоциациясининг Роналдуга ушбу либосни кийиб, ташкилотни реклама қилиши учун катта пул тўлагани ҳақида хабарлар айланди. «Дарё» ушбу воқеликларга изоҳ сўраб, ташкилотнинг биринчи вице-президенти Шерзод Тошматов билан боғланди.

Дастлаб Шерзод Тошматов ассоциациянинг Криштиану Роналду «UMMAA.UZ» либосида чиққанлигига муносабатини қуйидагича баён этди:

«Биз ассоциация футболкасида дунёнинг энг яхши футболчиларидан бирини кўриб ҳайратга тушдик десам, ҳеч кимни ҳайрон қолдирмаган бўламан деб ўйлайман. Ҳа, биз Криштианунинг бошқа кўплаб спорт юлдузлари сингари, ўтган йили эсдалик сифатида совғаларимизни қабул қилганини билардик. Ўшанда бир қатор машҳур кишиларга ҳам бундай буюмлар юборилганди. Аммо келинг, ҳақиқатни тан олайлик, бу даражадаги машҳур кишидан нафақат футболкани кийишини, балки ўзининг Instagram саҳифасига уни кийган ҳолдаги суратни қўйишидан умид қилиш имконияти паст эди. Бу ерда эса гап Роналдунинг 218 миллион обуначиси бўлган Instagram профили ҳақида кетмоқда. Табиийки, биз бундан, албатта, хурсанд бўлдик ва бизни тушуниш мумкин. Кейин эса ижтимоий тармоқларда биз Роналдуга тўлаган пуллар тўғрисида турли хил бўлмағур гаплар пайдо бўла бошлади, бироқ бу шунчаки кулгили. Фақатгина суратга қараш ва унинг Nike бренди остида (Роналдунинг компания билан реклама борасида шартномаси бор) суратга тушган расмлари билан таққосланганда дарҳол ҳамма нарса аён бўлади: у ҳолатда ҳаммаси брендни реклама қилиш мақсадида олдиндан режалаштирилади, бунисида эса футболчи шунчаки оила даврасида ўзи учун қулай бўлган футболкада логотипнинг кўриниши ҳақида қайғурмасдан дам олишга қарор қилган. Мен буни олдин ҳам айтганман ва яна такрорлайман, биз икки ой аввал янги UMMAA логотипини эълон қилганмиз ва бу футболка Роналдунинг шахсий танлови эканлигини яна бир бор исботлайди. Дарвоқе, ажойиб танлов!».

Ҳабиб Нурмагомедов Ўзбекистон MMA ассоциацияси билан яқин дўст ҳисобланиши, ўз навбатида Ҳабиб ва Роналду ҳам анча яқинлиги, ташкилот либосини кийишига Ҳабибнинг алоқаси бўлиши мумкинлиги ҳақидаги саволга эса Тошматов қуйидагича жавоб берди:

«Ҳабиб Нурмагомедовни ҳақиқатан ҳам ассоциациямизнинг яқин дўсти деб атаса бўлади. MMA’нинг ёрқин вакили сифатида унинг қўллаб-қувватлаши бизнинг ёш ташкилотимиз учун муҳим аҳамият касб этади. У шахс сифатидаги намунаси, муваффақияти тарихи, инсоний фазилатлари билан спортга энди кириб келаётган кўплаб ёшлар учун қўлланма бўлиб хизмат қилади. Мен Ҳабибнинг ўзи UMMAA маркали аксессуарларни кийишдан мамнун бўлишини биламан, бироқ у Роналду ёки бошқа бировга ҳам худди шундай қилишни тавсия қилган деб ўйламайман. У ёки бу формани кийиш – жуда нозик масала, шу боис бундай сўровлар етакчи брендлар билан қатъий шартномалар билан боғланган жаҳон даражасидаги спортчилар орасида аҳамиятли бўлмайди».

Ассоциациянинг биринчи вице-президенти ўзбекистонлик MMA спортчиларининг карантин вақтидаги ҳолати ва нималар билан машғуллиги ҳақида ҳам гапириб ўтди:

«Яхши спорт формасини ушлаб туриш – спортчилар учун биринчи галдаги вазифа ҳисобланади. Бахтимизга, карантин қоидалари жорий этилгунига қадар биз аралаш жанг санъатлари бўйича биринчи Ўзбекистон чемпионатини ўтказишга ва миллий терма жамоани шакллантиришга муваффақ бўлгандик. Ҳозирги вақтга келиб, барча йигитларимиз ўзини-ўзи яккалаш ҳолатида ва уларнинг ҳаммаси карантин қоидаларига амал қилмоқда. Шу билан бирга улар Zoom иловаси ва Instagram’даги жонли эфирдан фойдаланиб, мунтазам равишда машғулотларни онлайн режимда олиб бормоқда ва терма жамоа бош мураббийи билан доимий алоқада бўлиб турибди».

Тошматов коронавирус пандемияси бошқа спорт турларида бўлгани каби ассоциациянинг яқин келажакдаги режаларини ҳам ўзгартириб юборганини таъкидлаб ўтди:

«Ҳозирги вазиятни ҳисобга олиб, аниқ режалар ҳақида гапириш осон эмас. COVID-19 пандемияси, спорт тақвимларига ҳам ўз таъсирини кўрсатди: Ўзбекистон ва бутун дунёда деярли барча спорт мусобақалари бекор қилинди ёки қолдирилди. MMA’ни янада оммалаштириш, янги истиқболли жангчиларни жалб қилиш, республика минтақаларида фаол ишлаш ва эртами, кечми қайта тикланадиган халқаро мусобақаларга тайёргарлик кўриш ҳар қандай ҳолатда ҳам ўз долзарблигини йўқотмайди».