Ўзбекистон телеканалларида II жаҳон уруши воқеаларини ўзида акс эттирган «Илҳақ» бадиий-тарихий фильми намойиш этилган эди. Бироқ баъзи бир ижтимоий тармоқлардаги каналлар ва саҳифалар ушбу фильмни муаллиф розилигисиз ўзларининг саҳифаларига жойлаштириб, муаллифлик ҳуқуқлари поймол қилинишига сабаб бўлмоқда.
Адлия вазирлиги ҳузуридаги Интеллектуал мулк агентлигининг «Дарё»га маълум қилишича, муаллифлик ҳуқуқини бузган шахслар жавобгарликка тортилади.
Хусусан, Маъмурий жавобгарлик тўғрисидаги кодекснинг 177-1-моддаси (Муаллифлик ҳуқуқини ва турдош ҳуқуқларни бузиш)га асосан муаллифлик ҳуқуқини ва турдош ҳуқуқларни бузганлик учун маъмурий жавобгарлик белгиланган бўлиб, унга кўра асарларнинг ва турдош ҳуқуқлар объектларининг контрафакт нусхаларини, шунингдек, уларни такрорлаш ҳамда тарқатиш учун фойдаланиладиган материаллар ва ускуналарни ҳамда бошқа ҳуқуқбузарлик содир этиш қуролларини мусодара қилиб, фуқароларга базавий ҳисоблаш миқдори (223 000 сўм)нинг бир бараваридан беш бараваригача, мансабдор шахсларга эса — беш бараваридан ўн бараваригача миқдорда жарима солишга сабаб бўлади.
« ‘Ўзбеккинo’ Миллий агентлиги буюртмаси асосида муаллифлар жамоаси — актёр ва актрисалар, режиссёрлар, сценарий муаллифларининг заҳматли меҳнатлари билан яратилган асарни ҳуқуқ эгаларининг розилигисиз ижтимоий тармоқларга жойлаштирманг, ўзгаларнинг меҳнатини қадрланг ҳамда ўзингизнинг фуқаролик позициянгиз билан миллий кино саноати ривожига ҳисса қўшинг», — деб таъкидлаган Интеллектуал мулк агентлиги матбуот хизмати.
Изоҳ (0)