АҚШда ишсизлик даражаси коронавирус пандемияси туфайли Буюк тушкунлик давридан бери энг ёмон натижани қайд этиб, 14,7 фоизга тушди. Бу ҳақда АҚШ Меҳнат вазирлигига таяниб, The Washington Post хабар қилган.
Февраль ойида мамлакатда ишсизлик даражаси 3,5 фоизни ташкил қилганди. Март-апрель ойларида АҚШ ҳукумати иқтисодиётни музлатиб, инфекциянинг тарқалишига тўсқинлик қилишга уринди, аммо бу оммавий қисқартиришларга, ишсизлар сонининг ўсишига олиб келди.
АҚШ президенти Дональд Трамп ушбу вазиятга қарамай иқтисодиётнинг тезда ўзига кела олишига ишонмоқда.
«Иш ўринлари яна қайтади ва бу тез фурсатларда амалга ошади, 2021 йил феноменал йил бўлади», — деган у Fox News’га берган интервьюсида.
The Washington Post берган маълумотларга кўра АҚШ меҳмонхоналар сектори тахминан 7,7 миллион нафар ишчи, чакана савдо соҳаси — 2,1 миллион, ишлаб чиқариш соҳаси — 1,3 миллион иш ўрнини йўқотган. Бундан ташқари, соғлиқни сақлаш тизимида ҳам 1,4 миллион атрофидаги иш ўринлари қисқарган, бунга сабаб одамларнинг инқироз шароитида тиббиёт ходимларига камроқ мурожаат қилиб, асосан, заруратга кўра тез тиббий ёрдамдан фойдалана бошлагани бўлиши мумкин.
Апрель ойида ишини йўқотган тахминан 18 миллион нафар одам уларнинг ишдан бўшаши вақтинчалик бўлганига, компаниялар ҳам иқтисодиётнинг тўхташи қисқа муддатли эканига ишонган. Яна 2 миллион киши эса ўз ишидан узил-кесил айрилганига ишонишини айтган.
Шунга қарамай, АҚШда апрель ойида кузатилган ишсизлик даражаси прогноз қилинганидек даҳшатли бўлмаган. Апрель ойи ўрталарида The Wall Street Journal газетаси кутилаётган йўқотишлар 22 миллион иш ўрни бўлиши, ишсизлик даражаси эса 18 фоизга етишини тахмин қилган.
Буюк тушкунлик даврида АҚШда ишсизлик даражасининг энг юқори чўққиси 1932 йилда кузатилган ва 25,5 фоизни ташкил қилганди.
Апрель охирида АҚШ президентининг иқтисодий масалалар бўйича маслаҳатчиси Кевин Ҳассетт пандемия тугаганидан кейин мамлакатдаги ишсизлик даражаси Буюк тушкунлик давридаги кўрсаткичга яқин келиши ҳақида огоҳлантирган ва ушбу инқироз АҚШ иқтисодиётидаги энг каттаси эканини қайд этганди.
Трамп коронавирус туфайли ишини йўқотаётган америкаликлар манфаатларини ҳимоя қилиш учун иммиграцияни тўхтатиш ҳақидаги фармонни имзолаган. Унинг айтишича бу пандемия тугаганидан кейин уларнинг иш олиш учун навбатларда биринчи бўлишига шароит яратади.
Изоҳ (0)