Жаҳон соғлиқни сақлаш ташкилотининг Европа минтақавий бюроси директори Ханс Клюге 5 май, сешанба куни Twitter’даги саҳифасида Туркманистон ҳукумати томонидан ташкилот номига мамлакатда коронавирус билан боғлиқ вазиятнинг махсус миссия томонидан иложи борича тезроқ ўрганилиши истагини билдириб юборган таклифномаси етиб келганини маълум қилди. Бу ҳақда «Хроника Туркменистана» хабар берган.
22 апрель куни Туркманистон ТИВ раҳбари Рашид Мередов мамлакатда COVID-19 билан касалланганлар борлиги ҳақидаги маълумотнинг яширилаётганини инкор қилган ва ЖССТ ҳамда бошқа халқаро ташкилотлар вакиллари келиб карантин марказини кўздан кечиришини таклиф этганди. Бу вақтда Тожикистон ва Туркманистон ҳукуматлари ушбу мамлакатларда расман COVID-19 юқтириб олишга алоқадор ҳолатлар йўқлигини маълум қилган.
ЖССТ миссияси Тожикистонга 1 майда ташриф буюрди. Мамлакат ҳукумати бир кун аввал, 30 апрелда коронавирусга чалиниш бўйича ҳолатлар кузатилганини расман эълон қилганди.
Бироқ экспертлар Тожикистондан кейин Туркманистонга етиб кела олмаган. Хабарларга кўра, Туркманистон ҳукумати ЖССТга расмий таклифнома юбормаган.
3 майда ЖССТнинг мамлакатдаги ваколатхонаси раҳбари Паулина Карвовска Туркманобод ва Туркманбошида иккита карантин ҳудудида бўлганини маълум қилганди.
БМТ вакилларининг қайси санада карантин ҳудудларида бўлгани борасида аниқ маълумот берилмаган. «Хроника Туркменистана» нашри 27 апрелдаги шамол бўрони Туркманободдаги карантин лагери чодирларини вайрон қилгани ҳақида хабар берган.
Расмий Ашхобод ҳали ҳам Туркманистонда COVID-19 коронавирус инфекциясига чалинган беморларнинг йўқлигини таъкидламоқда. Айрим маълумотларга кўра эса Мередевнинг баёнотидан бир неча кун ўтгач коронавирусни юқтириб олган барча беморлар мамлакатдаги касалхоналарга яшириб қўйилган.
Изоҳ (0)