Германиянинг Der Spiegel нашрининг ёзишича, хакерлар 2015 йилда Бундестагга ҳужум пайтида Германия канцлери Ангела Меркелнинг икки почтасидан парламент офисидаги 2012 йилдан 2015 йилгача бўлган ёзишмаларини кўчириб олган бўлиши мумкин.
Нашрда ёзилишича, Федерал жиноят полицияси идораси (BKA), ахборот хавфсизлиги бўйича федерал идора ҳамда Карлсруэ шаҳридаги хусусий фирмаси хакерлар ҳужумини қисман тиклашга муваффақ бўлди. Уларнинг аниқланишича, хакерлар Меркелнинг парламент идорасида 2012 йилдан 2015 йилгача бўлган барча ёзишмаларини ўз ичига олган иккита почтасини кўчириб олган. Ўғирланган маълумотларнинг умумий ҳажми 16 гигабайтни ташкил этган.
Хакерлар ёзишмаларни тўлиқ кўчириб олганми ёки унинг бир қисминими, «буни энди аниқ ишонч билан айтиб бўлмайди», деган нашрнинг хавфсизлик идораларига яқин манбалари. Шунингдек, таъкидланишича, маълумотлар муҳим ва қисман махфийлаштирилган маълумотлар сақланувчи канцлер идорасидан эмас, Меркелнинг парламентдаги офисидан ўғирланган.
Spiegel хакерлар Россия ҳукумати билан боғлиқ бўлиши мумкинлиги айтилган, лекин буни исботловчи далиллар келтирилмаган.
Изоҳ (0)