AQShda ishsizlik darajasi koronavirus pandemiyasi tufayli Buyuk tushkunlik davridan beri eng yomon natijani qayd etib, 14,7 foizga tushdi. Bu haqda AQSh Mehnat vazirligiga tayanib, The Washington Post xabar qilgan.
Fevral oyida mamlakatda ishsizlik darajasi 3,5 foizni tashkil qilgandi. Mart-aprel oylarida AQSh hukumati iqtisodiyotni muzlatib, infeksiyaning tarqalishiga to‘sqinlik qilishga urindi, ammo bu ommaviy qisqartirishlarga, ishsizlar sonining o‘sishiga olib keldi.
AQSh prezidenti Donald Tramp ushbu vaziyatga qaramay iqtisodiyotning tezda o‘ziga kela olishiga ishonmoqda.
“Ish o‘rinlari yana qaytadi va bu tez fursatlarda amalga oshadi, 2021-yil fenomenal yil bo‘ladi”, — degan u Fox News’ga bergan intervyusida.
The Washington Post bergan ma’lumotlarga ko‘ra AQSh mehmonxonalar sektori taxminan 7,7 million nafar ishchi, chakana savdo sohasi — 2,1 million, ishlab chiqarish sohasi — 1,3 million ish o‘rnini yo‘qotgan. Bundan tashqari, sog‘liqni saqlash tizimida ham 1,4 million atrofidagi ish o‘rinlari qisqargan, bunga sabab odamlarning inqiroz sharoitida tibbiyot xodimlariga kamroq murojaat qilib, asosan, zaruratga ko‘ra tez tibbiy yordamdan foydalana boshlagani bo‘lishi mumkin.
Aprel oyida ishini yo‘qotgan taxminan 18 million nafar odam ularning ishdan bo‘shashi vaqtinchalik bo‘lganiga, kompaniyalar ham iqtisodiyotning to‘xtashi qisqa muddatli ekaniga ishongan. Yana 2 million kishi esa o‘z ishidan uzil-kesil ayrilganiga ishonishini aytgan.
Shunga qaramay, AQShda aprel oyida kuzatilgan ishsizlik darajasi prognoz qilinganidek dahshatli bo‘lmagan. Aprel oyi o‘rtalarida The Wall Street Journal gazetasi kutilayotgan yo‘qotishlar 22 million ish o‘rni bo‘lishi, ishsizlik darajasi esa 18 foizga yetishini taxmin qilgan.
Buyuk tushkunlik davrida AQShda ishsizlik darajasining eng yuqori cho‘qqisi 1932-yilda kuzatilgan va 25,5 foizni tashkil qilgandi.
Aprel oxirida AQSh prezidentining iqtisodiy masalalar bo‘yicha maslahatchisi Kevin Hassett pandemiya tugaganidan keyin mamlakatdagi ishsizlik darajasi Buyuk tushkunlik davridagi ko‘rsatkichga yaqin kelishi haqida ogohlantirgan va ushbu inqiroz AQSh iqtisodiyotidagi eng kattasi ekanini qayd etgandi.
Tramp koronavirus tufayli ishini yo‘qotayotgan amerikaliklar manfaatlarini himoya qilish uchun immigratsiyani to‘xtatish haqidagi farmonni imzolagan. Uning aytishicha bu pandemiya tugaganidan keyin ularning ish olish uchun navbatlarda birinchi bo‘lishiga sharoit yaratadi.
Izoh (0)