Республика махсус комиссияси ва Махсус штабнинг 14 апрелдаги қўшма йиғилиши қарорига асосан коронавирус инфекцияси кенг тарқалишининг олдини олиш мақсадида пенсионер ва нафақахўрларнинг саломатлигини сақлаш учун май ойидан пенсия ва нафақаларни тўлиқлигича пластик карталарга ўтказиш орқали амалга оширилиши белгиланган эди. Май ойининг бошидан бошлаб ижтимоий тармоқлар фойдаланувчилари карталарни етказиб бериш билан боғлиқ муаммолар, Халқ банки филиалларида пенсияларни олишдаги узундан узун навбатлар ҳақида ёзмоқда.
«Gazeta.uz» муштарийларидан бири Нукус шаҳридаги Халқ банки филиали қаршисида пайдо бўлган навбатнинг видеокадрларини улашган. Банк ходимларининг маълум қилишича, фуқаролар филиалга турли тўловларни амалга ошириш, картадаги пулларни нақдлаштириш ва бошқа мақсадларда келган.
Молия вазирлиги ҳузуридаги Бюджетдан ташқари пенсия жамғармаси ва Халқ банки 7 май куни қўшма мурожаат билан чиқиб, банк Тошкент, Нукус ва вилоят марказларида барча нафақахўр ва пенсионерлар учун пластик карталар очганини маълум қилди. Ўз навбатида Пенсия жамғармаси 1,4 триллион сўм ҳажмдаги пул маблағлари тўланишини молиялаштирган.
Мурожаатда таъкидланишича, бир вақтнинг ўзида 480 мингдан ортиқ пенсия ва нафақаларни банк карталарига юкланиши АТ Халқ банкининг электрон ахборот тизимида юқори даражада юклама келтиришига сабаб бўлган.
«Пенсия жамғармаси томонидан ҳар бир пенсия ва нафақа олувчи тўғрисида юборилган файллар Халқ банки серверлари базасидаги фуқароларга очилган карта маълумотлари билан автоматик тарзда солиштирилиб, тасдиқлангандан сўнггина пенсия ва нафақа маблағлари тегишли банк карталарига ўтказилди», — дейилади хабарда.
Бундан ташқари, май ойининг дастлабки кунлари дам олиш кунларига тўғри келганлиги боис пенсия пуллари 4 май санасидан бошлаб банк карталарига юкланиши бошланган.
Шунингдек, пенсия ва нафақа олувчи барча фуқароларга банк карталари фуқароларнинг яшаш манзилларига банкнинг сайёр кассалари томонидан олдинги пенсия тарқатиш графиги бўйича етказилиб, мазкур банк карталаридан фуқароларнинг хоҳишига кўра стерилланган маблағлар нақдлаштириб берилади.
Таъкидланишича, банк карталарини фуқароларнинг яшаш манзилларига етказилиш ҳолати ўрганилганда, баъзи туман бўлимларида, пенсия ва нафақа олувчиларга банк карталарини тарқатишда фуқароларнинг бир жойга тўпланиш ҳолатлари кузатилган. Марказий банк қарорига кўра, банк карталари ҳар бир пенсионер ва нафақа олувчининг хонадонига етказиб берилиши керак.
Пенсия жамғармаси ва Халқ банки юқорида келтирилган вақтинчалик ноқулайликлар учун узр сўрайди. Пенсия тўловларини етказиш билан боғлиқ саволлар бўлса, Халқ банкининг — 1106 ҳамда Пенсия жамғармасининг — 1140 «ишонч телефони» орқали мурожаат қилиш мумкин.
Изоҳ (0)