Президент Шавкат Мирзиёев 8 май куни Қозоғистон президенти Қосим-Жўмарт Тўқаев билан телефон орқали мулоқот қилди, дея хабар бермоқда давлат раҳбарининг матбуот хизмати.
Суҳбат аввалида давлат раҳбарлари яқинлашиб келаётган байрам — фашизм устидан қозонилган Ғалаба куни муносабати билан бир-бирларини табриклаб, икки мамлакат фахрийлари ва биродар халқларига тинчлик, сиҳат-саломатлик ва фаровонлик тилаган.
Чегараолди ҳудудларда Сардоба сув омборидаги фавқулодда ҳодиса оқибатларини бартараф этиш мақсадида яқин ҳамкорликни давом эттиришга алоҳида эътибор қаратилган. Жабр кўрган туманларда аҳолига манзилли ёрдам кўрсатиш ва инфратузилмани тиклаш бўйича навбатдаги қадамлар келишиб олинган.
«Президентлар коронавирус инфекцияси тарқалиши билан боғлиқ жорий эпидемиологик вазиятни ҳам кўриб чиқдилар. Пандемияга қарши кураш, аҳоли ва бизнес учун чекловларни босқичма-босқич юмшатиш борасида мамлакатларимизда кўрилаётган чоралар қўллаб-қувватланди», — дейилади расмий ахборотда.
Мулоқот чоғида савдо-иқтисодий соҳада эришилган келишувларни тез фурсатларда амалга ошириш, жумладан, автомобилсозлик, қишлоқ хўжалиги, қайта ишлаш саноати, транспорт ва логистика, бошқа тармоқларда истиқболли лойиҳаларни тайёрлаш ва илгари суриш муҳимлиги қайд этилган.
Президентлар халқаро аҳамиятга молик қатор масалалар юзасидан ҳам фикр алмашган. «Суҳбат якунида кўп асрлик дўстлик, яхши қўшничилик ва стратегик шерикликка асосланган кенг кўламли Ўзбекистон—Қозоғистон ҳамкорлигини кенгайтиришга интилиш қатъий экани таъкидланди», — дейилади Президент матбуот хизмати ахборотида.
Изоҳ (0)