Ўзбекистонда 8 май куни 12:30 га қадар коронавирусга чалинганлардан яна 32 нафари соғайиб, реабилитацияга кузатилди. Соғлиқни сақлаш вазирлигидан маълум қилишларича, Сирдарё вилоятида саккиз нафар, Наманган вилоятида 22 нафар, Андижон вилоятида эса икки нафар бемор касалликдан соғайган.
Сирдарёда соғайганларнинг бари Қозоғистондан келгач карантинга олинганлардир; касаллик аниқлангач, улар шифохонага ётқизилган эди. Беш нафари Самарқанд вилоятидан, икки нафари Тошкент вилоятидан, бир нафари Сирдарё вилоятидан. Беморларнинг бари эркак, энг каттаси 44 ёшда, энг кичиги 21 да. Сирдарёда соғайганлар сони 13 нафарга етди.
Наманганда тузалган 22 кишининг бари шу вилоятнинг ўзидан, улар касалликни коронавирусга чалинганлар билан мулоқот орқали юқтириб олган. 10 нафари эркак, 12 нафари аёл, энг каттаси 73 ёшда, энг кичиги 7 ёшда. Наманган вилоятида коронавирусдан соғайганлар сони 159 нафарга етди.
Андижонда соғайганларнинг иккаласи — 32 ёшли аёл ва 28 ёшли эркак — Андижон шаҳридан, касалликни коронавирусга чалинганлар билан мулоқот орқали юқтириб олган. Андижон вилоятида коронавирусдан соғайганлар сони 135 нафарга етди.
«Айни пайтда мамлакатимиз бўйлаб коронавирус инфекциясидан бутунлай соғайганлар 1688 нафарга етди», — дейилади Ўзбекистон Соғлиқни сақлаш вазирлиги ахборотида. Эслатиб ўтамиз, 8 май соат 10:00 ҳолатига кўра Ўзбекистонда коронавирусга чалинганлар сони 2314 нафарга етган; ўтган вақт давомида беморларнинг 10 нафари вафот этган.
Изоҳ (0)