Сирдарё вилоятининг Сайхунобод туманида 5 май куни юз берган ЙТҲ оқибатида 3 киши ҳаётдан кўз юмди. Бу ҳақда Тергов бошқармаси хабар бермоқда.
Ҳодиса соат 23:30 да «Дўстлик» МФЙ ҳудудида содир бўлган. 31 ёшли ҳайдовчи Р.М. Matiz’да йўловчилар билан ҳаракатланаётганида бошқарувни йўқотиб, йўл бўйидаги П-12 каналига ағдарилиб кетиб йўл транспорт ҳодисасини содир қилган.
Ҳайдовчи Р.М. автомашинада йўловчи сифатида кетаётган фуқаролар 30 ёшли А.Д. ва 22 ёшли Р.М. (аёл) ҳодиса жойида вафот этган.
Ҳолат юзасидан Сайхунобод тумани ИИБ ҳузуридаги Тергов гуруҳи томонидан Ўзбекистон Республикаси Жиноят кодексининг 266-моддаси 3-қисми «а» банди (одамлар ўлимига олиб келган транспорт воситалари ҳаракати ёки улардан фойдаланиш хавфсизлиги қоидаларини бузиш) билан жиноят иши қўзғатилган.
Жорий ҳафтада одам ўлими билан якунланган яна бир нечта ЙТҲ содир бўлди. 4 май куни Самарқанднинг Ургут туманида «Жигули» ва юк машинаси тўқнашиши оқибатида 22 ёшли аёл ва унинг 2 ёшли боласи, Қашқадарёнинг Ғузор туманида Lacetti асфалт ётқизиш машинасига урилиши оқибатида 31 ёшли ҳайдовчи, 5 май куни Навоий вилоятининг Навоий шаҳрида Nexia-3 автомобили светофорнинг қизил чироғидан катта тезлик ўтиб симёғочга урилиши оқибатида 26 ёшли ҳайдовчи вафот этганди.
Изоҳ (0)