Андижон вилоятининг Асака туманида тулки болаларини сотишга уринган фуқаро 1 миллион 115 минг сўм жаримага тортилди.
Андижон вилоят Экология ва атроф-муҳитни муҳофаза қилиш бошқармаси ахборот хизматининг маълум қилишича, 2020 йилнинг 17 апрель куни Асака туманида яшовчи фуқаро ижтимой тармоқларда тулки болаларини сотишини айтиб, хабар қолдирган. Шундан сўнг бошқарма томонидан ишчи гуруҳ тузилиб, ўрганиш олиб борилган.
Ўрганиш натижасида тулки болаларини пулламоқчи бўлган шахс Асака шаҳар, «Гулшан» маҳалласида истиқомат қилувчи фуқаро А.С. эканлиги аниқланган.
Фуқаронинг айтишича, у тулки болаларини Асака туманидаги адирликлардан ушлаб, хонадонида сақлаб келган ва сотиш мақсадида Telegram’да эълон берган.
Таъкидланишича, тулки болалари сотилиши ҳақидаги эълондаги суратда тулки боласи иккита эканлиги кўрсатилган. Бироқ ўрганиш давомида уларнинг биттаси қочиб кетгани маълум бўлган.
Тулки болаларини сотишга уринган фуқарога нисбатан Маъмурий жавобгарлик тўғрисидаги кодекснинг 92-моддаси (наслчиликка оид қисмига) асосан жаримага тортилган.
Бир дона тулки боласи эса вақтинча сақлаб туриш учун Хўжаобод туманидаги ҳайвонот боғига юборилган. Катта бўлганида очиқ табиатга қўйиб юбориш ҳақида боғ маъмурияти билан келишиб олинган.
Изоҳ (0)