Қарши шаҳрида 7 майдан бошлаб шахсий автомобиллар ҳаракати ва йўналишсиз таксилар фаолиятига рухсат берилди. Бу ҳақда 6 май куни вилоят ҳокими Зоир Мирзаев ҳудуд аҳолисига йўллаган мурожаатида маълум қилган. Қайд этишларича, кун давомида мақсадли ҳаракатланиш мумкин.
«Йўналишсиз таксиларга уч нафар йўловчи билан юришга рухсат берилган. Damas ва автобусларга рухсат берилмайди» — дейилади ҳокимлик ахборотида. Аҳоли карантин қоидаларига амал қилган ҳолда мотоцикл, скутер ва велосипедлардан ҳам чекловсиз, аммо мақсадли фойдаланиши мумкин.
Вилоятда, шунингдек, сартарошхоналар ва гўзаллик салонлари, савдо дўконлари ҳамда меҳмонхоналар (нонуштасиз) фаолияти ҳам қайта тикланади. Ушбу ўзгаришлар Қашқадарё вилояти «яшил» ҳудуд деб топилгани билан боғлиқ — айни вақтда вилоятда коронавирусга чалинган бирор бемор йўқ.
Аввалроқ Самарқанд ва Наманган вилоятлари «қизил» ҳудуд белгилангани, ушбу ҳудудларда карантин қоидалари ҳозирча юмшатилмаслиги маълум қилинган эди. Ҳудудларни эпидемиологик вазиятдан келиб чиқиб «қизил», «сариқ», «яшил» ҳудудларга бўлиш ташаббуси Президент раислигида 5 май куни бўлиб ўтган видеоселекторда илгари сурилган.
Қайд этиш жоиз, агар эпидемиологик вазият ёмонлашса, карантин чоралари қайта тикланади. «Эпидемиологик вазият яхшилангани сари чекловларни бекор қилишни давом эттирамиз. Аксинча, вазият ёмонлашса, карантин чораларини қайта тиклаймиз», — деб таъкидлаган Шавкат Мирзиёев.
Изоҳ (0)