Самарқанд ва Наманган — «қизил» ҳудуд. Бу вилоятларда карантин қоидалари юмшатилмайди

Президент Шавкат Мирзиёев раислигида 5 май куни бўлиб ўтган йиғилишда Ўзбекистонда карантин қоидаларининг босқичма-босқич юмшатилиши давом этиши, бунда ҳудудлар эпидемиологик вазиятдан келиб чиқиб «қизил», «сариқ», «яшил» ҳудудларга ажратилиши таъкидланган эди.

Самарқанд вилояти ҳокимлиги ахборот хизматидан маълум қилишларича, вилоят эпидемиологик жиҳатдан «қизил» (юқори хавфли) ҳудудга киради, шу боис Самарқандда карантин қоидалари ҳозирча юмшатилмайди. «Бу ҳақда вилоят комиссиясининг айни вақтларда ўтказилаётган йиғилишида маълум қилинди. Фуқаролардан карантин қоидаларига қатъий амал қилиш сўралади», — дейилади Самарқанд вилояти ҳокимлиги ахборотида. Соғлиқни сақлаш вазирлиги маълумотларига кўра, вилоятда 5 май соат 23:00 ҳолатига кўра 140 кишида коронавирус аниқланган, уларнинг 34 нафари (24 фоизи — Ўзбекистон бўйича энг паст иккинчи кўрсаткич) соғайган.

Наманган вилояти ҳам мавжуд эпидемиологик вазият туфайли «қизил» ҳудудга киритилди. Вилоят бўйича 6 майга қадар 230 нафар шахс коронавирус инфекциясига чалингани аниқланган ва Наманган бу кўрсаткич бўйича республикада Тошкент шаҳри (668 нафар бемор), Бухоро вилояти (435) ва Хоразм вилоятидан (232) кейинги тўртинчи ўринда турибди. «Наманган эпидемиологик жиҳатдан ‘қизил’ (юқори хавфли) ҳудудга кириши эътиборга олиниб, карантин қоидалари ҳозирча юмшатилмайди», — дейилади ҳокимлик ахборотида.

Эслатиб ўтамиз, 5 майдаги видеоселектор йиғилишида карантин тартиби юмшатилиши доирасида стикерлар бекор қилиниши ва шахсий автомобиллардан чекловсиз фойдаланишга рухсат берилиши таъкидланган эди, бироқ чекловлар қачон, қаерда ва қай тартибда бекор қилиниши юзасидан Республика махсус комиссияси баёнот бериши айтилган эди. Республика махсус комиссияси ҳозирча баёнот бергани йўқ.

Қайд этиш жоиз, агар эпидемиологик вазият ёмонлашса, карантин чоралари қайта тикланади. «Эпидемиологик вазият яхшилангани сари чекловларни бекор қилишни давом эттирамиз. Аксинча, вазият ёмонлашса, карантин чораларини қайта тиклаймиз», — деганди Президент Шавкат Мирзиёев 5 май куни бўлиб ўтган видеоселектор йиғилишида.