Шавкат Мирзиёев Оқолтин ва Мирзаобод туманларида бўлиб, аҳоли билан суҳбат қилди, сўнгра Тошкентга қайтиб келди

Шавкат Мирзиёев Сирдарё вилоятига ташрифи давомида Сардоба туманидан ташқари Оқолтин ва Мирзаобод туманларида ҳам бўлди. Бу ерларда ҳам мутасадди ходимлар фавқулодда ҳодиса етказган зарар, уларни бартараф этиш бўйича кўрилаётган чоралар ҳақида Президентга ахборот берди, дейилади Президент матбуот хизматининг хабарида.

Ахборот бўйича сув тошқини Оқолтин туманининг «Шодлик» ва «Аҳиллик» маҳаллаларига ҳам зарар етказган. Уларда яшаётган 11 мингдан зиёд аҳоли Гулистон шаҳри ҳамда Жиззах вилоятининг Мирзачўл ва Дўстлик туманларига эвакуация қилинган. Ушбу нохуш воқеа оқибатида тумандаги жами 13 минг 397 гектар пахта, ғалла ва полиз экинларига зарар етган.

Президент мутасаддиларга ҳар бир хонадон эгалари билан гаплашиб, уларнинг уй-жойларини таъмирлаш, яхши шароити мавжуд хонадонларга аҳолини қайтариш бўйича кўрсатмалар берди.

Мирзаобод туманида нуронийлар, маҳалла оқсоқоллари ва фаоллари, жамоатчилик вакиллари билан учрашув бўлди.

Ушбу туман ҳам сув тошқини катта таъсир кўрсатган ҳудудлардан бири. «Навбаҳор», «Ҳақиқат», «Баҳористон» ҳамда «Йўлдошобод» маҳаллаларида яшовчи қарийб 15 минг аҳоли туманнинг «Янгиобод» маҳалласи ҳамда Янгиер шаҳрига жойлаштирилган. Жами 7084 гектар қишлоқ хўжалиги майдонига зарар етган.

Шавкат Мирзиёев қурилиш-таъмирлаш ишларини халқ билан маслаҳатлашиб амалга ошириш, деҳқон ва фермерлар муаммоларини жойига чиққан ҳолда ҳал этиш зарурлигини таъкидлади.

Аҳоли вакиллари давлат раҳбарига шундай қийин вазиятда халқ билан бирга бўлгани, қисқа вақтда катта ишлар қилиниб, ҳаёт изга тушаётгани учун миннатдорлик билдирди.

Шу ерда ҳукумат аъзолари, мутасадди раҳбарлар билан қишлоқ хўжалиги майдонларини қайта фойдаланишга киритиш, шикаст етган йўл ва кўприкларни таъмирлаш масалалари муҳокама қилиниб, чора-тадбирлар белгиланди.

Президент Шавкат Мирзиёев Тошкентга қайтиб келди, дейилади хабарда.