Бухоро вилоятида ўзгага тегишли 11 дона пластик карта ҳамда 958 доллар пулни ўғирлаган фуқаро қўлга олинди. Бу ҳақда «Дарё»га вилоят ИИБ ахборот хизмати хабар бермоқда.
Маълум бўлишича, Пешку туманида яшовчи 53 ёшли фуқаро Н.О. жорий йил 27 апрель куни Бухоро шаҳридаги Бухара Cитй бош офиси ёнида жойлашган дам олиш шийпончасида қолдириб кетилган ҳамённи ўғирлаган.
Бухоро шаҳар ИИБга мурожаат қилган тошкентлик З.Б. эса ўша куни 958 доллар пули, 11 дона пластик картаси, ҳайдовчилик ҳамда автомашина гувоҳномаси солинган қора рангли ҳамёни ўғирлангани ҳақида хабар берган.
Бухоро шаҳар Ички ишлар бўлими ходимлари томонидан олиб борилган тезкор суриштирув давомида ҳамён ўғриси Н.О. қўлга олинган.
Мазкур ҳолат юзасидан фуқаро Н.О.га нисбатан Жиноят кодексининг 169-моддаси 1-қисми (Ўзганинг мол-мулкини яширин равишда талон-торож қилиш) ва 227-моддаси 2-қисми «а» банди (Ҳужжатлар, штамплар, муҳрлар, бланкаларни, автомототранспорт воситаларининг ва улар тиркамаларининг давлат рақам белгиларини эгаллаш, нобуд қилиш, уларга шикаст етказиш ёки уларни яшириш) билан жиноят иши қўзғатилган.
Иш юзасидан ҳозирда дастлабки тергов ҳаракатлари олиб борилмоқда.
Изоҳ (0)