Ўзбекистонда 2 май куни соат 15:30 гача Наманган вилоятида коронавирусга чалинган 17 нафар, Тошкент шаҳрида 13 нафар, Қорақалпоғистон Республикасидан саккиз нафар, Хоразм вилоятидан уч нафар, Андижон вилоятидан икки нафар бемор соғайиб, реабилитацияга кузатилди. Бу ҳақда Соғлиқни сақлаш вазирлиги хабар бермоқда.
Наманганда янги соғайганларнинг бари касалликни коронавирусга чалинган беморлар билан мулоқотда юқтириб олган эди. Улардан саккиз нафари эркак, тўққиз нафари аёл. Беморларнинг бари Наманган вилоятидан (етти нафари Наманган шаҳридан, беш нафари Уйчи туманидан, тўрт нафари Наманган туманидан, бир нафари Янгиқўрғон туманидан). Улар орасида энг каттаси 53 ёшда бўлса, энг кичиги 6 ёшда. Вилоятда коронавирусдан соғайганлар сони 89 нафарга етди.
Тошкент тиббиёт академияси кўп тармоқли клиникасидан соғайиб чиққанларнинг етти нафари Тошкент шаҳридан, олти нафари Тошкент вилоятидан. Уларнинг олти нафари Россиядан келган ва карантинга олинган, касаллик аниқлангач, мазкур клиникага ётқизилган. Қолган етти нафари эса коронавирус инфекциясига чалинганлар билан мулоқотда бўлиб, касалликни юқтириб олган. Уларнинг тўққиз нафари эркак, тўрт нафари аёл; энг каттаси 54 ёшда, энг кичиги 2018 йилда туғилган. Тошкентда коронавирусдан соғайганлар сони 393 нафарга етди.
Қорақалпоғистонда янги соғайганларнинг бари Қорақалпоғистондан (етти нафари Нукус шаҳридан, бир нафари Мўйноқ туманидан) бўлиб, улар касалликни коронавирусга чалинганлар билан мулоқот орқали юқтириб олган эди. Беморларнинг тўрт нафари эркак, тўрт нафари аёл; энг каттаси 65 ёшда, энг кичиги 12 ёшда. Қорақалпоғистонда коронавирусдан соғайганлар сони 70 нафарни ташкил этмоқда.
Хоразмда тузалганларнинг бир нафари шу вилоятнинг ўзидан, у касалликни коронавирусга чалинганлар билан мулоқотда юқтириб олган, қолган икки фуқаро Наманган ва Самарқанд вилоятларидан. Уларнинг иккиси ҳам Россиядан чартер рейс билан келган ва карантинга олинган, инфекция аниқлангач, касалхонага ётқизилган. Хоразмда коронавирусдан соғайганлар сони 138 нафарга етди.
Андижонда соғайганларнинг бир нафари Андижон шаҳридан, ёши 45 да; яна бири Олтинкўл туманидан, 43 ёшда. Улар касалликни коронавирусга чалинганлар билан мулоқотда юқтириб олган. Вилоятда коронавирусдан соғайганлар сони 111 нафарга етди.
Соғлиқни сақлаш вазирлигидан маълум қилишларича, 2 май соат 15:30 ҳолатига кўра Ўзбекистон бўйича коронавирус инфекциясидан соғайганлар 1255 нафарни ташкил этмоқда. Қайд этиш жоиз, жами қайд этилган касалланиш ҳолатлари сони 2094 тани ташкил этмоқда, ўтган вақт давомида беморларнинг тўққиз нафари вафот этган.
Изоҳ (0)