30 апрель куни соат 18:30 ларда Сурхондарё вилояти Жарқўрғон туманида одам ўлими билан якунланган йўл-транспорт ҳодисаси содир бўлди. Бу ҳақда ЙҲХББ хабар берди.
Ҳодиса «Ҳайитобод» маҳалласи ҳудудидан ўтувчи халқаро М-41 Бишкек—Душанбе—Термиз автомобиль йўлининг 1575-километрида содир бўлган. 1997 йилда туғилган С.Р. бошқарувидаги Matiz қувиб ўтиш манёврини бажариш учун қарама-қарши йўналишга чиққан. Қаршисидан ҳаракатланиб келаётган автомобиль билан тўқнашмаслик мақсадида С.Р. ўз автомобилини чапга олиб, Жарқўрғон—Сурхон йўналишида қарама-қарши томондан ҳаракатланиб келаётган велосипедчи 1965 йилда туғилган А.Қ.ни уриб юборган.
А.Қ. оғир тан жароҳати олиб воқеа жойида вафот этган.
Апрель ойининг охирги ҳафтасида одам ўлими билан якунланган бир неча ЙТҲ содир бўлди. 27 апрель куни Сурхондарёнинг Шўрчи туманида Nexia ва «Камаз» тўқнашуви оқибатида енгил машинанинг 27 ёшли йўловчиси, Тошкентда «Газель» ва Hyundai Porter тўқнашуви оқибатида юк машинасининг 55 ёшли ҳайдовчиси, 28 апрель куни Шўрчи туманида Nexia ва «Зил» тўқнашуви оқибатида енгил машинанинг 29 ёшли ҳайдовчиси, 29 апрель куни Жиззахнинг Пахтакор туманида Matiz ағдарилиб кетиши оқибатида 25 ёшли ҳайдовчи ва 13 ёшли йўловчи вафот этганди.
Изоҳ (0)