Фото: Сардобадаги фалокат кўламини ўзида акс эттирувчи суратлар

Сирдарёдаги Сардоба сув омборидан 1 май куни сув тошиб чиқиши натижасида юз берган фалокат ҳақида хабар берилган эди. Ижтимоий тармоқларда мазкур фалокатнинг кўламини акс эттирувчи суратлар пайдо бўлди.

Эслатиб ўтамиз, 1 май куни соат 05:55 да Сирдарё вилоятида жойлашган Сардоба сув омбори дамбасининг 6-пикет деворида сув чиқиши юзага келган. Натижада Сардоба тумани Қўрғонтепа аҳоли яшаш пунктига сув кирган. Бунда, асосан, сув экин майдонларига зарар етганлиги маълум бўлди.

Воқеа жойига дастлаб бош вазир Абдулла Арипов, ундан кейин Президент Шавкат Мирзиёев етиб борди.

Сардоба сув омбори атрофидаги маҳаллалардан 11,5 минг аҳоли эвакуация қилинди. Сув остида қолган маҳаллалар аҳолиси Жиззахдаги мактаб ва коллежларга жойлаштирилди.

Фавқулодда вазиятлар вазирлиги кун давомида сув омбордан сув чиқиши камайганини ва кейинчалик тўхтаганини маълум қилди. Сув омбори тўғони бузилиб, сув тошиб чиқишига кучли ёмғир ва шамол сабаб бўлгани маълум қилинди. Шавкат Мирзиёев сув омбори тўғонининг бузилган жойини бориб, кўздан кечирди.

Мазкур фалокат оқибатида алоқа ва телекоммуникация хизматларида узилишлар бўлиши мумкинлиги маълум қилинди.