Тошкентда юраги касал, COVID-19 коронавирусини юқтириб олган ҳомиладор аёл фарзанд дунёга келтирди. Бу ҳақда Соғлиқни сақлаш вазирлиги жамоатчилик билан алоқалар бўлими хабар қилган.
Хабарга кўра, 24 ёшли У.Б. илк ҳомиладорлиги бўйича оилавий поликлиникада рўйхатда турган. Бемор 2017 йилда туғма юрак нуқсони туфайли мураккаб жарроҳлик операциясини ўтказган.
2020 йилнинг 9 апрель куни Тошкент шаҳар 4-сон клиник шифохонасининг туғруқ бўлимига 32-33 ҳафталик ҳомила билан ўткир респиратор касаллиги ташхиси билан келган. Тиббиёт муассасасида коронавирус инфекциясига текшириш учун суртма олинган. 10 апрель куни таҳлил натижаси мусбат эканлиги аниқланган.
Шундан сўнг ҳомиладор аёлга ихтисослашган тиббий ёрдам кўрсатиш мақсадида оғир аҳволда Тошкентдаги 3-сон туғруқ комплексига ўтказилган.
Туғруқ мажмуасида кардиохирург, кардиолог, пулмонолог, инфекционист, терапевт, анестезиолог-реанематолог ва акушер-гинекологлар томонидан аёл тиббий кўрикдан ўтказилиб, зарурий текширувлардан сўнг керакли даволаш чора-тадбирлари белгиланган.
Кардиохирург томонидан туғруқни жарроҳлик йўли билан амалга ошириш тавсия қилинган. Аёл 1 май, жума куни, вазни 3150 грамм, бўйи 52 сантиметр бўлган ўғил бола чақалоқни дунёга келтирди.
Ҳозирда аёлнинг ва янги туғилган чақалоқнинг аҳволи яхши, улар шифокорларнинг қатъий назорати остида, дейилади хабарда.
Мавзуга доир:
- Ўзбекистонда коронавирусга чалинган ҳомиладор аёллар учун қандай шароитлар яратилган? ССВ жавоб берди
- Карантин сабабли ёпилган Республика перинатал маркази май ойида очилиши мумкинлиги айтилди
- Республика перинатал маркази (САМПИ)да ҳомиладор аёллардан бирида коронавирус аниқланди. Марказ карантинга ёпилди
Изоҳ (0)